Aruba no por atende cu Reino den union Antiano

The content originally appeared on: Diario

Reforma cu ta culmina den pakete COHO a cuminsa na Aruba na 2014 — *Reino for di 2018 a otorga Wever-Croes un lugar special pa recuperacion —*No por mara futuro di Florin Arubano na futuro Florin Curacao y St. Maarten

ORANJESTAD(AAN)–Central den e futuro financiero na e momentonan aki ta, e realisacion di e pakete di medidanan mara na un prestamo substancial di Reino Hulandes despues cu Covid-19 a basha planificacion di Reino, paisnan den Reino incluso Aruba, abou.

E punto di partida di cambio den maneho financiero den Reino, sinembargo, no ta 2020 ora Covid-19 a complimenta e calamidad financiero di Aruba, Curacao y Sint Maarten ocasiona pa mal maneho financiero di e paisnan.

Cada uno di e paisnan autonomo den Reino den Caribe ya tabata tin nan problema a base di situacionnan cu nan mes a crea, na nan forma pa nan pais.

Introduccion di COHO na 2020 a entrega un palabra na reforma, cu ya a wordo introduci dor di Reino.

Na 2014 tabata Ministro Hulandes Ronald Plasterk cu a bati alarma grandi pa futuro di Florin Arubano, cu tabata na peliger serio pa e forma cu Gobierno Mike Eman a abusa di placa di Aruba.

For di e momento Aruba a wordo poni bou supervision pa scapa e Florin Arubano, cu sin asistencia di Hulanda lo a perde su balor.

Gobierno Mike Eman a pone Florin directamente na riesgo dor di baha entrada di e pais pa Gobierno Mike Eman haya voto.

Salud di Florin ta depende di un maneho financiero den balansa, cu a wordo kibra.

Aruba a perde casi 100 Miyon pa aña na entrada na 2010, loke a nifica cu a destrui loke ta fundeshi di Florin sano.

Ademas Gobierno Mike Eman a sigui haci mas debe sin control pa paga den futuro cu ta awe, mientras a tranca economia cu e fantasia di Citgo.

Den rapportnan oficial por mira con un calamidad financiero a wordo hereda dor di Gobierno Evelyn Wever-Croes, cu a hereda Aruba bou supervision pues cu exigencia pa reforma di parti di Hulanda a base di e responsabilidad cu Statuut ta pone den man di Hulanda.

Na 2018 segun Hulanda a bisa, Gobierno Mike Eman a laga Aruba den estado di bancarota.

Na 2018, Hulanda a atende tambe cu Curacao y Sint Maarten y kier a crea un solo pakete pa tur e paisnan.

Na 2018, Prome Ministro Evelyn Wever-Croes a logra convence Hulanda pa duna Aruba un lugar exclusivo den negociacionnan financiero pa futuro. A base di e pasonan cu ya Gobierno Wever-Croes a tuma, Hulanda a bay di acuerdo cu un areglo pa supervision apart pa Aruba pa asina reforma e maneho di placa.

Ta a base di e acuerdo entre Aruba y Reino na 2018 pa scapa e Florin Arubano cu ta depende di bon maneho financiero, Aruba tabata tin cifranan prepara pa 2020 ora Covid-19 a bati na porta y a ataca e bienestar economico, financiero y social di Aruba.

Na 2020 mescos cu na Curacao y Sint Maarten, Reino a yega na acuerdonan cu ta pa cada pais y pa cada pais ta diferente.

Tur informacion cu DIARIO tin ta mustra cu Aruba mester mantene su posicion exclusivo cu Prome Ministro Wever-Croes a logra cu Reino Hulandes.

Aruba por discuti un que otro cu Curacao y Sint Maarten pero Aruba no por ta mara na politica di e otro paisnan Hulandes den Caribe, cu tin nan maneho autonomo tambe.

“Aruba no por regresa na un 12-8 pa regla asunto den Reino,” informantenan a mustra mientras Aruba ta prepara pa e bishita di Alexandra van Huffelen, e Secretario di Estado di Hulanda cu a dicidi cu e mes ta bolbe bishita Aruba y e otro paisnan pa yega na un acuerdo pa COHO, cu ta e organo di reforma.

El a indica cu no por yega na un reforma si un pais no kier e reforma pero cu e mes lo sinta na mesa cu e paisnan durante Mei y Juni mientras cu e topico lo wordo atende durante e Contacto Interparlamentario na Sint Maarten tambe.

Kico e resultado ta si un pais no por acepta, no ta conoci. Si ta conoci cu Reino tin un respet pa loke Prome Ministro Evelyn Wever-Croes a logra y e forma cu e ta negocia cu Reino.

“E situacion mundial alarmante sigur ta motibo pa tin bon palabracion den Reino y un maneho firme pa sigui dilanti,” informantenan ta mustra.

Pero Aruba mester atende su maneho autonomo pa Aruba lucha pa sobrevivencia di su Florin Arubano.

Manera ta conoci, Curacao y Sint Maarten tin un union monetario base riba un union di moneda y Banco Central, mientras Aruba tin su propio moneda y Banco Central, hancra den e lucha pa Status Aparte di Aruba.