Aruba mester baha for di nubia!

The content originally appeared on: Diario

Recuperacion gigantenan poderoso mundial ta na peliger serio — *Lockdown nobo lo bira final di hopi compania y caida di entrada  — *Produccion mundial por bandona “drive” y drenta “reverse”

ORANJESTAD(AAN—Cu entrada di 2022, economia mundial mester a conoce recuperacion, cu ta sumamente importante pa paisnan graindi conoci como gigantenan poderoso mundial.

Durante e ultimo dianan DIARIO a vigila tur desaroyo mundial, cu atrobe ta marca pa incertidumbre creciente y hasta panico!

Ora atende cu recuperacion mundial, sigur mester atende cu economia na e paisnan cu ta gigante economico pero ta vigila un situacion cu por trece un cambio total pa entrada di 2022.

Den preparacion pa e edicion di e ultimo fin di siman prome cu dianan di fiesta 2022 anuncia mes, DIARIO a topa cu e preocupacion serio pa e situacion na Aruba.

“Mester prepara pa medidanan mas severo cu ya a wordo tuma. Mester papia di fondonan cu mester pa atende cu un situacion di crisis nobo pero tambe medidanan importante pa mantene cuponan di trabou,” a bini dilanti.

Pregunta grandi ta si tin fondo di Aruba of di Reino pa asistencia na empresanan y ciudadanonan manera tabata e caso na 2021.

DIARIO tambe a inventarisa y discuti cu expertonan diferente desaroyonan sumamente importante sigur na paisnan cu tin impacto importante pa Aruba.

Riba e lista aki ta figura sigur Hulanda, di cual Aruba ta depende financieramente y Estados Unidos cu ta e mercado di turismo mas importante pa Aruba.

Hulanda ayera tabata en espera di decision di Gobierno Rutte, cu awe mester dicidi si e ta decreta lockdown, loke lo bira un cargamento pisa pa economia Hulandes.

Informantenan clave na Hulanda a indica na DIARIO, cu un lockdown na entrada di e siman di Pasco lo nifica cu un cantidad di empresa Hulandes lo mester cera nan porta mientras cu companianan grandi cu ya ta den problema serio, ya ta ahusta nan planificacion.

Ora ta papia di e desaroyonan empresarial na Hulanda, ta papia di cantidad di negoshi chikito pero tambe di empresanan grandi manera sigur ta e caso cu e aeropuerto Schiphol, cu ta uno di e puntonan grandi di preocupacion di Gobierno Hulandes.

Aruba mester tene cuenta cu e desaroyonan aki, cu ta nifica cu e poblacion Hulandes ta drenta un situacion dramatico nobo, cu ta exigi gastonan enorme di gobierno Hulandes cu mester presta tur atencion na su situacion actual.

Cifranan oficial di Hulanda ta mustra, con na 2021 Hulanda a trata di recupera di e situacion cu e pais ta pero na final di e careda di 2021, ta wordo confronta cu un realidad nobo.

DIARIO ta presenta cifranan di Gobierno Hulandes pa loke ta trata fayo di presupuesto di epais.

Merca, cu ta e mercado turistico importante di Aruba, tambe ta presenta cifranan cu ta indica crecemento di Covid-19, manera por mira riba e grafico.

Na ciudadnan grandi di Merca, medidanan ta wordo tuma contra mas infeccion cu e malesa. Varios centro di recreo ta cera nan porta pa evita contagio.

Ora papia di economia mundial sigur mester observa China, cu a anuncia cu Omicron a bati na su porta.

Esaki a socede na momento cu China ta den suspenso di e desaroyonan na e compania Evergrande, gigante economico di e pais, cu ta den bista di mundo pa su problemanan financierto. Informacionnan ta indica con creditornan Chines a entrega un caso pa 13 Biyon Florin contra e compania.

Problema financiero di e empresa por tin efecto grandi na mundo.

Informantenan a indica cu e momento a yega pa den tur sector di Aruba baha for di nubia y cuminsa atende cu Aruba na un forma cu ta refleha e realidad pisa di e pais.

Mester prepara Aruba pa un situacion mundial sumamente serio, si no ta esun mas serio for di Segundo Guera Mundial of hasta pio pasobra e Coronavirus nobo no ta descrimina entre paisnan cu e ta ataca.

Produccion mundial ta wordo menasa atrobe. E situacion comercial internacional tabata den “drive” y awe ta den “reverse” manera expertonan a trece dilanti.

A wordo adverti cu na 2020 a crea e speransa cu na final di 2021 por a prepara pa un futuro nobo.

Na salida di 2021 ta papia di e realidad cu Covid-19 lo bira un enfermedad mas riba e lista cu mester di vacuna pa wordo controla na 2024. Kico esaki ta nifica pa 2022 y 2023 ainda ta estudio di un mundo yena cu inseguridad, cu cual Aruba mester tene consideracion manera a bini dilanti.