Aruba hopi cerca di cumpra combustible pa WEB directamente for di Petroecuador

The content originally appeared on: Diario

ORANJESTAD (AAN) – Minister Glenbert Croes, den conferencia di prensa a expresa su gratitud pa e sosten cu Embahada di Hulanda na Ecuador, a brinda su persona y delegacion, durante nan viahe reciente, unda nan a reuni cu e Minister di Energia y Minas nobo y e Vicepresidente di

Hidrocarburo.

E mandatario a bisa cu e plataforma di apoyo diplomatico di e Embahada di Hulanda, ta instrumental pa habri e porta na un forma corecto y digno, pa mustra e seriedad di e intencionnan di e gobierno di Aruba pa acercamento cu cualkier pais, y den e caso aki Ecuador.

Croes a señala cu Aruba a wordo hopi bon ricibi door di ambos mandatario, y durante e reunionnan tabata tin ehecutivonan halto di Petroecuador, y durante e reunionnan aki ya caba a sali padilanti, e boluntad di e Gobierno di Ecuador, e Minister y Petroecuador, pa coopera cu e solicitud di Aruba pa logra un relacion directo entre e companianan Nacional cu ta Refineria di Aruba NV y Fuel Marketing Supply Aruba, pa cumpra directamente e combustible cu WEB mester, sin pasa via intermediario.

Nan a expresa cu esey tambe ta nan intencionnan y cu e companianan nacional, NVnan estatal no tin nodi di uza intermediario; den e caso aki Aruba ta cumpra di un compania cu ta cumpra di un otro compania, cu despues ta cumpra di Petroecuador, y door di elimina e dos brug aki, bo ta spaar pueblo di Aruba masha hopi placa, cu ta permiti bo baha prijs di awa y coriente, e dignatario a bisa.

E mandatario a bisa cu locual Aruba a keda hopi contento cune ta cu door cu RdA y Fensa ta 100% di Pais Aruba, e Minister a urgi Petroecuador pa no laga nos companianan participa den negociacionnan cu otro compania priva; e negociacionnan ta bay ta directo, na termino husto, balansa, cu lo ta un “win-win” pa Ecuador y sin duda pa Aruba.

Croes a reitera cu durante e prome reunion Aruba a planta e semia caba, pa WEB haya e combustible cu nan mester, segun nan propio expectativa.