Aruba Food & Beverage Association trahando duro riba atraccion di personal pa horeca

The content originally appeared on: Diario

ORANJESTAD  (AAN): Aruba Food & Beverage Association (AFBA) a tene un conferencia di prensa Diamars, pa papia riba e preocupacionnan cu nan tin pa loke ta personal den industria di horeca.

C.O.O di AFBA Miriam Dabian a trece dilanti cu pa alrededor di 2 aña e asociacion ta trahando masha duro hunto cu instancia y ministerionan di Gobierno pa logra atende cu e scarcedad di empleadonan califica den horeca.

“Na varios occasion durante e 2 añanan nos a organiza job fairs pa por logra interesa e hobennan den nos industria y tambe duna oportunidad na nos miembronan pa por yena e vacaturanan cu tin den nan negoshi”.

Mediante e job fair a logra yena algun vacatura, pero ainda falta hopi, segun Dabian.

El a sigui bisa cu semper a keda e necesidad pa busca personal Arubiano, of personanan cu tin permiso pa biba riba nos isla.

Segun Dabian, e problema tey ainda y ultimo lunanan cos ta mustra di ta mas dificil, mirando cu tin mas hotel cu ta bay habri cu tambe tin meter di empleadonan.

“Banda di e job fair nos a bin tambe cu algun iniciativa manera e union cu nos a haci aña pasa cu OAA”.

Nos a cuminza un proyecto piloto cu algun studiante y personanan cu tin e interes pa traha den horeca, unda cu durante un periodo di 9 luna nan ta haya teoria y practica hunto cu nos miembronan, segun Dabian.

El a splica tambe cu AFBA den esaki ta den e fase final y cu ta buscando un manera pa ofrece mas hoben e oportunidad pa participa na e programa.

E COO di AFBA a bisa tambe cu e industria turistico di Aruba ta sigui crece y hopi turista ta keda den alohamento alternativo, mientras cu tin un paro pa loke ta hotelnan All Inclusive.

“Tur esaki ta nifica cu tin mas presion riba nos como industria di alimento y bebida, pa cumpli cu e necesidad di e bishitante pa ricibi bon servicio, bon cuminda y bon bebida”, segun Dabian kende a indica cu esaki sigur lo bay bon si tin personal califica y adecua pa duna un bon servicio.

El  sigui bisa cu e miembronan di AFBA tin e capacidad financiero necesario pa tuma mas personal y pesey ta papiando cu instancianan di Gobierno pa facilita e proceso di busca of contrata personal pa traha den horeca.

Prensa a puntra Dabian tocante e hecho cu hopi hende ta señala cu un di e problemanan den horeca ta cu e salarionan ta demasiado abao, pero Dabian a duna di conoce cu por ehempel un persona cu ta laba tayo den horeca ta ricibi un salario di alrededor di 3000 florin pa luna, cu ta bastante mas cu e salario minimo.

Banda di esaki ora cu e persona traha durante oranan regular, e ta haya algo acerca.

Dabian a indica tambe cu den mundo di horeca e tips ta algo atractivo sigur.