Aruba como Miembro di Reino den mundo actual

The content originally appeared on: Diario

E Guera na Ukraine a reforsa e posicion di un Europa Uni — *Defini e posicion di teritorionan Europeo na otro continente — *Aruba mester sondea beneficionan den cambionan mundial

ORANJESTAD(AAN)—Den e realizacion di un Europa Uni, e crecemento economico, financiero y social di e paisnan sigur a hunga un papel importante.

Awe den loke mester cualifica como un guera mundial, e desaroyo di un Europa sumamente fuerte ta bini dilanti tur dia y ta duna mas forsa na e pensamento di entre otro Ukraine di bira parti di un union fuerte di paisnan.

E futuro di Europa tabata sigur na discusion negativo durante ultimo decadanan, ora e salida di Inglatera ta uno di e factornan cu a haci hopi hende pensa cu Union Europeo ta hala su ultimo rosea.

E salida di Inglatera for di Union Europeo tabata algo cu por a spera, teniendo na cuenta e naturalesa Britanico, den e sentido positivo di e palabra.

Inglatera ta Europa? Un pregunta cu na momentonan historico clave a wordo haci pero cu a wordo ripiti ora Inglatera a dicidi cu e ta separa su mes di Union Europeo mientras na varios pais sonidonan di salida di e union di paisnan, a resona.

Na momento cu existencia di Europa tabata parce mas discutibel cu nunca, Vladimir Putin a dicidi di duna motibo, pa Europa uni.

Vladimir Putin, e oponente grandi di Union Europeo, a invadi Ukraine y asina a exigi Union Europeo bolbe na e motibo di su existencia, cu ta creacion di loke ta realmente un super nacion.

Ayera tabata un dia importante den e Guera di Ukraine ora a bira conoci cu Europa ta permiti Ukraine bira miembro di Union Europeo y Ukraine hunto cu Moldovia a haya e status di Estado Candidato pa Union Europeo.

E Guera di Ukraine pues a cuminsa duna prueba di cambionan grandi cu mundo por spera den un futuro cu lo contene e realizacion di un mundo cu cambionan grandi cu Aruba sigur mester tene na cuenta.

Aruba indirectamente ta uni na Union Europeo, cu ta haya forsa nobo den e situacion mundial actual, cu por considera inespera.

Cu Aruba no ta parti directo di Union Europeo a bini dilanti den e hecho cu Aruba no ta directamente envolvi den e Guera na Ukraine manera ta e hecho cu Hulanda, cu ta pais den Reino Hulandes pero na mes momento parti di Europa.

E hecho cu Aruba ta parti di Reino Hulandes, te awor a duna e Arubiano como portador di e pasaporte Europeo, hopi beneficio.

Cuanto beneficio tin den e situacion actual di un mundo cu ta marca teritorionan nobo?

Cuanto beneficio mas Aruba por saca di su relacion cu Reino den un mundo, cu ta bay exigi (sea cu paisnan kier of no kier) pa mas y mas paisnan dicidi riba nan futuro.

Na e momentonan aki, Aruba ta un “overzees gebiedsdeel” un pais na otro banda di Oceano cu ta parti di Reino Hulandes. Kico mas e posicion aki por nifica pa Aruba, cu sigur mester haci bon uzo di tur su opcionnan den e mundo nobo, cu ta wordo crea?

E Guera na Ukraine a reforsa e pensamento di un Europa Uni pa hopi motibo y hasta pa integridad nacional, manera cierto paisnan Europeo a demostra.

Den e situacion regional di Aruba actualmente, con importante integridad nacional ta?

Mundo y asina Aruba ta pasa den un tempo di cambionan sumamente grandi riba tur tereno.

Aspectonan importante di nos realidadnan cu no tabata haya suficiente atencion, awor mester bini dilanti.

Un futuro nobo a cuminsa. Manera hopi bez nos a trece dilanti, pasado a keda atras.

Ta den e aurora di un dia nobo, Aruba mester sondea tur posibilidad pa su crecemento y beneficionan cu e tin den un posicion sumamente interesante di pais directamente mara na e gigante Europa, den e region Caribense cu pa un grandi parti tin problema pa defini su mes y asina no tin e potencialnan di Aruba, pa colmo economicamente mara na Merca cu tur beneficio cu esaki ta encera.

Ban traha riba futuro!