Aruba Bank a yuda inaugura Proyecto Horticultura na SPO Santa Cruz

The content originally appeared on: Diario

ORANJESTAD (AAN): Aruba Bank ta contento di por a incentiva studiantenan di Scol Practico pa Ofishi Santa Cruz pa realisa e proyecto Horticultura.


    Despues di a gana e tercer puesto durante di e Good4theNeighborhood – School Edition na 2014, cu nan proyecto di Green House, como tambe tercer puesto na 2015 cu nan ‘video project’, cual a enfoca ariba e topico di recyclahe di awa pa spaar na consumo, SPO Santa Cruz a uza nan premionan cu nan a ricibi en efectivo pa nan Proyecto Horticultura.

    Un seccion den e cura di scol a worde destina pa e Proyecto Horticultura, unda e studiantenan awor ta haya les di cultiva, planta y cuido di matanan cu ta duna fruta, manera pica, pinda y boonchi. Manera nan Green House, Horticultura tambe a bira parti e e curiculo di e scol.

    Team di SPO a duna honor na e representantenan di Aruba Bank, Kenneth Tromp, cu a yuda guia e proyecto di Green House y Roxanne Kock-Croes, coordinadora di G4N pa haci e inauguracion oficial di e Proyecto Horticultura.

    Directora di scol SPO, Zoraida Godoy a duna su palabra di agradecimiento na Aruba Bank cu nan por a logra e proyecto aki. E iniciativa di Good4thNeighborhood pa tur e scolanan secundario sigur ta hopi positivo pa asina nan por sigui desaroya, inspira y motiva e alumnonan pa traha den ekipo y realisa un proyecto.

    Pabien un biaha mas na henter e team di SPO Santa Cruz y na tur alumnonan cu a realisa e tremendo iniciativa aki cu ta aporta na educacion di nos hobennan, eficiencia di e scol, y na medio ambiente di nos pais.