Aruba Art Fair lo tuma lugar e dianan 4, 5 y 6 di November y lo ta un explosion di eventonan fabuloso

The content originally appeared on: Diario

ORANJESTAD (AAN) — Den cuadro di e celebracion di e di 5 aña di existencia di Aruba Art Fair, ArtisA ta destaca tur su eventonan, den un magno siman di Arte, ART WEEK.

            ARTWEEK, ta un siman di eventonan di arte, conocimento, educacion, moda combina cu arte culinario, exposicion, fotografia, cine, musica, un experiencia inolvidable.

            Durante un siman cu ta inicia October 31, Halloween, Promenade ta transforma su mes den un museo di arte cayehero, vibrante y latente.

November 1, 2022: Muralistanan local y Internacional lo duna workshop na e comunidad pa asina instrui e posibilidad di traha cu diferente sorto di pintura y tecnica di arte di traha muralnan. Algo sumamente interesante.

November 2, 2022, ART FASHION, e cayanan ta luci un cambio total, na unda e pasarela ta un pintura bibo riba caya, yamativo y colorido desplegando e tema Climate Change.

Mas di 12 diseñador local y Internacional, entre otro Elisa Lejeuz lo trece creacionnan unico cu e tema Climate Change den nan presentacion.

“Mala Mucha” ta un di e invitadonan di Bonairo, cu lo ta un sorpresa grandi combinando canto, baile y moda.

Clint y Clayten di Curacao lo yama atencion pa Climate Change den Wild Fires, na unda colornan lo forma un fusion deslumbrante .

Sin laga afo, Atelier Dore, di Surinam, celebrando nan di 100 aniversario den e mundo di joya unico y vislumbrante, lo desplega 10 pieza exclusivo riba e tema aki.

Club di Movimento, celebrando su di 25 aña di Baile, lo representa RONZZIO Designs den e opening cu lo ta unico y explosivo. No lagando atras e creacion fantastico di Jhon Freddy Montoya di Departamento di Cultura, cu tur aña ta destaca enormemente.

            Algun cas di Moda lo trece nan creacionnan moderno y yamativo pa cu e tematica aki. E cas di moda grandinan aki ta conoci mundialmente pa nan preocupacion y participacion den Climate Change.

            Pa continua cu e fabuloso siman di arte , Aruba lo duna e bonbini na mas di 15 muralista local y Internacional cu lo cambia e cara di San Nicolas, enfatisando cu enberdad Aruba ta e Art Capital of the Caribbean.

            Pa loke ta e arte di Mozaik, a scoge pa e trapinan di Rodgers Beach wordo traha den un fabuloso obra di arte door di Artista Chileno residencia na Alemania Isidora Lopez Paz en conhunto cu e mas grandinan di Aruba.

            Divi Divi Resorts lo transforma, durante e siman di Arte, un casbashi den un restaurant artistico, cu un experiencia culinario exotico, den man di un chef invita for di Hulanda.

            Culminando e Artweek, Aruba Art Fair lo tuma lugar November 4.5.6, 2022, cu ta percibi di ta un explosion di Arte na unda mas cu 150 artista local y Internacional lo exhibi nan creacionnan.

Musica y baile den forma artistico di diferente scol di Aruba.

            Tur e eventonan ta wordo hasi posible dor di patrocinio di  Prins Bernard Cultuuronds Caribe, Unoca Aruba y Mondriaan Fonds Nederland.  Un danki special ta bay na Departamento di Cultura cu semper ta e forza tras di e evento aki.

galleryAruba Art Fair lo tuma lugar e dianan 4, 5 y 6 di November y lo ta un explosion di eventonan fabuloso/gallery