Aruba a duna bon bini na Grupo Pentair

admin

pentair1ORANJESTAD (AAN): Pentair ta un compania cu a worde funda na Minnesota na aña 1966, un compania cu ta opera plantanan di awa como tambe di coriente mundialmente. E compania Pentair ta emplea mas di 30.000 empleado rond mundo.

Durante luna di october 2013, algun ehecutivo di Pentair a bishita nos isla, pa inspecciona si por considera, Aruba como destino pa nan biahe di incentivo. Como tal, e grupo grandi aki ta yegando Aruba den e siguiente dianan.

Pentair ta un compania reconoci mundialmente cu un meta fuerte. Manera nan a splica: “E compania tey pa yuda mehora bida. Nos ta kere den un bida cu cuminda na un prijs acceptabel, awa limpi y energia den abundancia. Nos ta compronde con e necesidadnan aki ta interconecta: awa ta un necesidad critico pa laga cuminda crece y pa produci energia. Energia ta un necesidad esencial pa filter y pa re-uza awa. E relacion aki ta e fondo principal di e solucionnan cu nos ta desplega.”

E grupo aki ya ta biaha pa diferente pais y e aña aki nan a scoge Aruba como nan destinacion pa organiza un biahe di incentivo pa diferente top managers di nan compania.

Alrededor di 1000 persona lo yega Aruba den e siguiente dianan. Jerusha Rasmijn, ACB Conference & Events Manager ta splica cu un viahe di e magnitud aki sigur lo laga su impacto atras den nos economia y tambe pa e industra di MICE na Aruba.

Durante estadia di e grupo di Pentair na nos isla, e participantenan lo tin diferente oportunidad pa socialisa cu nos hendenan local y asina conoce mas di e destinacion. Un programa special a worde compila, bishitando diferente actividadnan, nos beachnan, nos mundo culinario etc. Ademas, nan lo ricibi e tarheta ‘VIP Shopping Card’ di Aruba Convention Bureau, dunando e grupo oportunidad amplio pa cera conoci cu nos tiendanan. Como cu e grupo aki ta consisti di alrededor di 1000 persona, Aruba Marriott Resort & Stellaris Casino por completo lo acomoda nan durante di nan estadia y adicionalmente lo tin parti di e grupo hospedando na The Ritz-Carlton Aruba.

Sergino Croes di ECO Destination Management a duna di conoce cu nan ta sumamente orguyoso cu nan por trece un grupo asina grandi pa Aruba. “Nos socionan como tambe comerciantenan a asisti di haci esaki un realidad y nos ta spera di crea un experiencia inolvidabel cu e bishitantenan di Pentair por keda corda pa hopi aña ainda despues cu nan bolbe nan pais” el a añadi.

Ademas, lo percura pa subi e bandera di Pentair na e rotondo di nos aeropuerto como un gesto pa yama e grupo grandi aki un caluroso bonbini!

 

Next Post

DIARIO no lo cambia su manera di skirbi Papiamento

Jossy Mansur: ORANJESTAD   (AAN):   Tin un dialogo tumando lugar entre linguistanan di Aruba, Bonaire y Corsow rond di nos idioma Papiamento. E meta di esaki ta pa yega na un Papiamento mas standariza den e islanan. Relaciona cu esaki, Jossy Mansur como Director di DIARIO y su staff a dicidi […]