Aruba a demostra cu e tin plannan solido pa bay conserva clima y naturalesa

The content originally appeared on: Diario

Ministro Ursell Arends:


Resultado di Foro di Dia di Mama Tera 

ORANJESTAD (AAN): Dialuna mainta, e di dos edicion di Foro di Dia di Mama Tera a tuma lugar den Ballroom di Hilton Aruba Resort, y e tema di e aña aki ta ‘Climate Resilience’, y a wordo organisa pa Ministerio di Ursell Arends.  Varios grupo di interes y demas stakeholder a asisti na esaki, pa asina e.o. lanza un “Conseho Nacional di Resiliencia Climatico”.

   Ministro Arends a indica cu e Foro tabata mas bien pa mira con Aruba ta bay prepara su mes pa cambionan climatico, y e Conseho Nacional aki lo bay prepara den terminonan cortico y largo, e manehonan con e isla ta bay atende cu e cambio climatico.

   Durante e Foro, a anuncia cu Aruba ta cera un partnership cu e instituto Mericano yama “Climate and Ocean Risk Vulnerability Index Asessment” (CORVI), y hunto cu e Ministerio di Geoffrey Wever y 13 stakeholder, ta financiando e estudio di como 18 luna largo haci pa CORVI, cu lo bay duna mas di 100 indicador, y como 3.000 punto di data pa e isla haya sa con pa atende cu cambio climatico.

   Tambe a anuncia partnership cu e plataforma “International Platform for Deltas and Coastal Areas and Islands” (IPDC) cu ta uno crea pa Gobierno Hulandes na e ultimo Conferencia COP di Nacionnan Uni pa cu Cambio di Clima, unda Aruba a mustra su adelanto riba e tereno aki.

   Hunto cu Gobierno, lo prepara e pais con pa atende cambio climatico.

   Ministro Arends a indica na DIARIO, cu dentro di poco e isla lo bay ta anunciando tur e plataforma cu Aruba ta colaborando pa mas di 12 luna caba cu nan, pa asina ta bon prepara pa no djis e naturalesa, sino e derecho di existencia pa sigui bay dilanti.

   Aruba ta lider den henter e preparacion climatico aki, y den e plataforma e isla ta e ‘campeon’ pa henter region di Caribe, y pesey cu e partnernan ta habri caminda y lidera e caminda pa e otro pais y islanan por sigui pa e forma cu e isla aki ta atende e cambio climatico.

   “Nos a scoge un ruta pa haci prome loke ta ‘scoping’, sigui pa ‘costing’, y despues a bay pa ‘financing’,” Ministro Arends a indica.  “Pa haci esaki, bo mester sa exactamente loke ta e retonan, pa despues por mara un cifra na cuanto ta bay costa pa atende cu nan, y unavez cu bo tin esey, e ora bo ta bay papia pa sa con ta bay financia e cambionan aki.  Esaki ta un ruta cu Aruba a escoge y a haya partnernan internacional pa yuda den e proceso aki.”

   Tur esaki ta pa por garantisa cu e futuro generacion tin un isla cu nan por sigui disfruta di dje, y cu mas importante ta cu naturalesa por sigui florece.