Arte di mosaic ta yuda den conscientisacion di malnutricion di muchanan na Aruba

The content originally appeared on: Diario

ORANJESTAD (AAN): Aruba a haci entrega oficial di un muraya di mosaic na San Nicolas como parti di un proyecto internacional.


E muraya di mosaic lo pone enfoke riba un di e retonan mas grandi den comunidad cu ta malnutricion di nos muchanan.

   Pa e proyecto aki artistanan local di mosaic Merveline Geerman, Mike Geerman y Enrita Werleman a worde acerca door di “Organización de Murales por un Argentina sin desnutrición infantil” y despues e artistanan a acerca Cosecha pa duna apoyo den e proyecto aki.

   Aruba ta e prome den region pa haya un muraya artistico cubriendo e tema social aki y cu hopi orguyo e partidonan envolvi a forma parti di e comunidad Internacional cu ta traha riba e murayanan aki rond di mundo.

   Pa 26 aña caba tin e Fundacion yama Conin na Argentina cu nan meta ta pa combati malnutricion di muchanan. Nan ta haci diferente actividad riba e tereno aki.

   Inspira door di e Fundacion Conin, tres aña pasa un periodista ta lanta e “Organización de Murales por un Argentina sin desnutrición infantil”. Muralistanan di mosaic ta worde invita pa join e organizacion. E meta di e organizacion aki ta pa crea conscientisacion tocante e tema di malnutricion di muchanan y crea conscientisacion di e Fundacion Conin na Argentina cu ta carga e proyecto Internacional aki.

   E “Organización de Murales por un Argentina sin desnutrición infantil” a cuminsa colabora cu artistanan Internacional desde 2018. Den 2019 Aruba a worde acerca door di e organización Internacional “Organización de murales ‘Por un mundo sin desnutrición infantil’”. Cu Aruba su participacion, Aruba ta haya e oportunidad riba un plataforma internacional pa yuda crea conscientisacion. Door di traha un muraya ta kies pa un manera sostenibel y permanente di hiba un campaña door di no usa papel, ta yuda embeyece lugarnan cu arte y e problema di muchanan cu malnutricion ta un problema cu semper mester haya atencion.

   E reto malnutricion di muchanan ta grandi pero na Aruba tin un fundacion activo riba e tereno aki y e fundacion aki yama “Ban Uni Man pa Cria Nos Muchanan”. Fundacion “Ban Uni Man pa Cria Nos Muchanan” ta ofrece desayuno gratis pa muchanan na scol. Nos a pidi e fundacion aki pa ta parti di e proyecto aki door di ta anfitrion.

   Pa por traha e muraya aki Aruba tabata tin mester hopi man di mosaic. E motibo cu e organizacion na Argentina a kies pa un man ta pasobra esaki ta e simbolo di e mucha cu ta pidi bon alimentacion y di esun cu ta dune bon alimentacion. E man cu ta pidi y e man cu ta duna. E enfoke ta riba un mucha cu ta ricibi malnutricion pa motibonan sociaal of economico; door di mal costumber den nos alimento, door di problema cu placa etc.

   Despues cu diferente tayernan a worde organiza na fin di 2019 den entre otro e Centro Creativo na Cosecha San Nicolas, na Mariniers Kazerne, na Atelier Arte “Atemosa” y diferente grupo a traha tambe na nan cas, nos a haya mas cu 200 man. Tur man ta unico pasobra por a decore segun smaak of diseño propio.  Na final nan a worde incorpora den diseño di un palo di watapana cu ta nos simbolo di para duro y sigui bula den e bon direccion. E diseño, crea door di Iustrador Ria Arrindell-Broeks, ta duna e piesa su toke local cu Aruba ta duna na e proyecto aki.

   Door di e situacion di Covid-19 cu mundo a worde enfrenta cune desde comienso di 2020, e proyecto a worde poni on-hold te cu par di luna pasa.

   E escogencia di e muraya pa pone e piesa tabata uno cu a bay na un manera hopi organico. Desde comienso tabata conoci cu e muraya artistico lo worde traha na San Nicolas, e ciudad di Arte y Cultura na Aruba. Cu colaboracion di SVb, nos a haya autorisacion pa pone e piesa di arte riba muraya di nan edificio na San Nicolas. SVb a sinti e necesidad pa duna aporte no solamente na arte pero tambe na e meta di combati malnutricion di muchanan door di conscientisacion.

   Cosecha y e artistanan local di mosaic envolvi den e proyecto aki kier pidi danki na cada un persona cu a aporta na e proyecto aki. Tambe kier invita comunidad di Aruba pa bin admira e piesa di arte aki cu un mensahe grandi.