Arma di ehercito por bira arma di atracador

The content originally appeared on: Diario

Ni pandemia a interumpi e ganashi creciente di e negoshi di morto


Guera ta destrui economia pero arma pa guera ta sostene economia
Defensa di un pais por produci arma pa mata hende rond mundo 

ORANJESTAD (AAN) – Kico ta origen di tanto arma cu tin rond mundo y ta wordo uza pa comete actonan di violencia?

Pa por midi e forma cu ciencia a avanza, no mester bay solamente hospital caminda dokternan ta lucha pa salba bida.

Adelanto cientifico ta bisto tur dia den noticia den cual “arma” ta topico den mayoria di suceso cu ta wordo presenta.

Violencia ta keda uno di e problemanan grandi na mundo. Violencia cu ta bisto den guera rond mundo, den criminalidad, den poder mundial. Violencia cu como base di e Guera di Ukraine a paralisa bienestar di mundo, a crea hamber y problema serio, pero ta alimenta e industria importante di arma.

Diariamente por tuma nota di mas y mas arma poderoso cu ta subi mercado mundial.

Cifranan internacional ta indica cu un suma total cu ta alcansa 500 Dollar ta e resultado di guera produci pa armanan cu ta negoshi den tur moneda na mundo.

Den presupuestonan di paisnan ta topa cu sumanan cu ta wordo inverti den arma pa defende comunidad na diferente forma.

E produccion di arma mundialmente ta uno di e sectornan economico mas grandi di mundo, cubri cu misterionan cu no ta alcansa hende, cu no ta haya contesta riba nan pregunta.

Uno di e preguntanan ta, con ta posibel cu continuamente tin rebeldenan cu ta tumba gobierno, di pandiya den caya, cu ta haci uzo di armanan costoso?

Na 2022 mundo a mira e cara di guera. Diariamente por mira con arma nobo ta presenta den un confrontacion cu a destrui economia mundial y ta causa hamber rond mundo.

Aparentemente tur hende na mundo, ta acepta sin mas cu tin ehercitonan ta confronta otro cu armanan cu ciudadanonan di paisnan mester paga.

Kico ta pasa cu armanan ora un guera termina of ora nan tempo a pasa pasobra arma mas moderno ta wordo uza?

Tin dos parti den e produccion di arma na mundo. E parti di produccion di arma pa defende pais y hende y e parti di produccion di arma pa destrui hende.

Con tanto arma tin origen desconoci?

Mas y mas na mundo investigacionnan ta wordo haci di e cantidad di arma cu paisnan ta laga atras ora un guera termina.

Kico ta pasa cu e armanan aki? Ta logra deshaci di tur arma cu a drenta?

Segun informacion di tanto investigacion cu ta tuma lugar mundialmente, den guera cantidad di arma cumpra na forma legal na paisnan productor di arma, ta cay den man robes y ta bira parti di un economia scondi. Arma ta wordo uza pa guera cu ta wordo considera destructor di mundo na mes nivel di malesanan serio, horcan y tur fenomeno natural.

Economia mundial ta bay atras enormemente di un banda. Di otro banda e industria di armanan ta sigui crece.

Restante di gueranan “oficial” ta wordo uza pa negoshi scondi di arma cu ta mata hende den conflictonan di rebeldenan pero tambe den asalto riba caya.

Covid-19 a basha economia mundial abou pa un gran parti. Pero cifranan nobo cu ta bira conoci ta indica cu e industria di arma a aumenta.

Gobiernonan ta inclui accion contra violencia na paisnan democratico. Mas y mas por tuma nota di incidentenan horibel cu uzo di arma den man di hende comun y coriente.

Mas y mas voznan ta lanta rond mundo pa atende e problema di arma, cu cual hende ta destrui su mes pa medio di guera y violencia.

Con ta bay controla arma na lugarnan caminda tin confrontacion manera na Ukraine y tanto otro pais rond mundo? Cuanto sitio di guera a bira tereno cu a produci arma?

Un temporada nobo ta spera mundo. Un temporada den cual informacionnan concreto ta wordo duna di e peligernan cu hende ta crea pa su mes den buskeda di su defensa y cu ta sostene hasta economia mundial.

“No mira solamente e bom atomico. Mira e armanan, cu den campo di bataya y pafor di camponan di bataya diariamente ta mata hende,” ta e acercamento nobo di e realidad di violencia cu ta parti real di bida na mundo.