Andy Lee nombra miembro nobo pa Aruba den Raad van State

The content originally appeared on: Diario

ORANJESTAD (AAN):  Diabierna mainta durante e reunion di Conseho di Minister di Reino, a aproba señor Rendolf (Andy) A. Lee, como e siguiente miembro pa Aruba den Raad van State,

cuminsando prome di Januari 2024. Manera ta conoci, e funcion aki a wordo ocupa durante e ultimo 6 añanan pa señora Milly Shwengle, cu a haci un excelente trabou den representa Aruba dignamente.

            Mirando e trayectoria profesional di señor Lee, representantenan di un comision independiente, a bin na e conclusion cu e lo ta un bon candidato pa por representa Aruba. Basa riba e recomendacion aki, Conseho di Minister di Reino, durante e reunion diabierna mainta 24 di November, a aproba su nombracion. 

            Prome Minister Evelyn Wever-Croes ta contento di por tin un representante pa Aruba den Raad van State, cu e cualidadnan y experiencia amplio, pa por tuma e miho decisionnan den bienestar di pais Aruba. Señor Lee ta un politicologo cu tin mas di 30 aña di experiencia den sector publico y semi-publico na Aruba, Corsou y Washington. Tambe, e tabata  miembro y presidente di Parlamento entre 2009 y 2010. Despues el a fungi como Minister Plenipotenciario na Washington pa Aruba, como consehero di Prome Minister entre 2018 y 2020, y a traha na Banco Central.

            Gobierno di Aruba ta felicita señor Lee cu su nombracion como miembro nobo pa Aruba den Raad van State, y ta dese’e hopi exito den e encargo nobo aki.