Alto Comisario ta sigui haci apelacion na hende pa entrega nan arma

The content originally appeared on: Diario

ORANJESTAD (AAN): Den un entrevista DIARIO a puntra Alto Comisario Ramon Arnhem riba e posibilidad cu cuerpo policial a ofrece esnan den comunidad pa entrega nan armanan

y el a splica cu enberdad varios arma a wordo entrega y cu e accion ainda ta na vigor.

Segun Arnhem tabata tin varios pregunta si e cahanan special di polis unda cu e armanan tabata wordo warda, tabata bin vigila.

“Tur cos tabata wordo vigila y e cahanan cu arma tabata wordo haci bashi”.

Nos mester djis comunica mihor kico nos tin planea pa haci cu e accion, segun e Alto Comisario.

El a sigui bisa cu despues lo duna un update si e accion di entrega arma tabata exitoso.

“Te cu aworaki mi ta hopi satisfecho y Ministerio Publico tambe”.

Ningun hende den comunidad tin mester di un arma, pues entrega esaki cerca nos pasobra e no lo wordo castiga, segun Arnhem.

DIARIO a puntra e Alto Comisario si ta trahando hunto cu por ehempel Douane, riba un manera pa baha entrada na Aruba di tanto arma.

El a splica cu e intencion sigur ta pa preveni cu e armanan ta drenta nos isla, pero si toch nan drenta mester percura pa nan sali for di circulacion.

Durante paradanan di Carnaval a haya hobennan cu entre otro cuchio of machete den nan posesion y pesey a puntra Arnhem su pensamento riba esaki.

El a splica cu a nota cu personanan cada vez mas hoben ta wordo haya cu arma y cu quizas nan no ta realiza ainda con malo esaki ta.

“Ta algo cu nos ta tuma hopi na serio y mester actua riba dje”.

Prome cu nan pensa di hinca un arma den nan saco pa bay Carnaval, nos tin cu bin cu un manera pa nan realiza cu esey ta algo cu bo no ta haci, segun e Alto Comisario.