Alternativa di ‘Eigen Bijdrage’ por spaar 7 pa 8 miyon na gastonan di remedi

The content originally appeared on: Diario

Minister Dangui Oduber:

ORANJESTAD (AAN)—Minister di Salud, Dangui Oduber, den conferencia di prensa dialuna, a sigui splica riba e tema di e alternativa pa reemplaza Eigen Bedrage, cu gobierno lo stimula competencia, lo percura cu e prijs di Apotheek cu lo bay tin ta e base central pa calcula e prijs di remedi importa. Awo esaki no ta e caso.

“Nos ta bay introduci tambe un structura di dialogo a base di cual lo reuni regularmente cu e sector, importadornan, Apotheker, Boticario, Hospital y AZV pa wak con ta baha prijs di remedinan caro y tambe nos ta bay facilita e proceso di registracion di remedi. Remedinan cu ya caba ta registra na Hulanda, Europa, Merca of Canada, nan proceso di registracion na Aruba lo wordo acelera. Esey no ta e caso na e momentonan aki. Y door di registra esaki y como cu nan ta registra caba den e paisnan cu a menciona, naturalmente, esaki lo conduci na reduccion di gastonan tambe. Kiermen, e cambionan aki di e ‘Landsbesluit verpakte geneesmiddelen’ ya caba ta canando, y e besparing cu nos ta premira door di esaki, nos ta kere cu lo ta entre 7 pa 8 miyon florin pa aña”, Minister di Salud, Dangui Oduber a subraya. Lo mira e resultado na aña 2023, e dignatario a indica.