Algemene Rekenkamer di Hulanda tambe a haya un bista di e esfuersonan haci pa mehora finansa publico di Aruba

The content originally appeared on: Diario

E reto ta e pago di e debe acumula cu Hulanda pa sobrepasa e pandemia

ORANJESTAD (AAN): Minister Maduro di Finansa y Minister President Wever-Croes ta cu biahe di trabao na Hulanda pa asina por reuni cu varios persona y instancia pa brinda nan un bista riba e finansa publico di e isla.

   E mandatarionan a bishita Algemene Rekenkamer di Hulanda pa asina nan tambe por a haya un bista di e esfuersonan haci pa mehora e finansa publico di Aruba y e reto nos dilanti pa paga e debe acumula cu Hulanda pa surpasa e pandemia di COVID-19.

   Aruba ta sobrepasando e efectonan di e pandemia y nos dilanti tin e reto pa paga e fiansanan haci na Hulanda bek. Algemene Rekenkamer ta controla e trabounan di Gobierno Hulandes y den nan trabou nan lo topa cu e fiansanan aki cu Hulanda a brinda na Aruba pa por surpasa e pandemia di COVID-19. E fiansanan haci cu Hulanda ta madura na oktober 2023 y prome cu esaki Gobierno Hulandes mester brinda claridad na Aruba cual ta e condicionnan pa e pago di e debe aki. E claridad aki ta importante ya cu Aruba kier mantene nos bon record di pago cerca nos creditornan internacional.

   Minister Maduro ta di opinion cu ta bon pa Rekenkamer como un Colegio Halto di Estado Hulandes den forma adelanta por tin un bista riba e situacion financiero di Aruba, e efuersonan haci promer, durante y despues di e pandemia y pa nan por ta bon informa tambe riba e capacidad di pago di nos Pais pa e debe acumula na Hulanda pa sobrepasa e pandemia di COVID-19. E miembronan di e Colegio di Rekenkamer a keda gradici di por a ricibi e presentacion detaya di Aruba su finansa publico.