Alex a bira e prome Horcan den Januari desde 1955

admin

horcan_alexORANJESTAD (AAN): Cosnan historico ta pasando riba Oceano Atlantico riba Diahuebs, ora cu Tormenta Subtropical Alex a forma un wowo hopi visible mey-mey di un cantidad di tormenta di lamper, pa asina haya e nomber di “Horcan Alex”.

Tabata Diahuebs mainta 11’or, cu National Hurricane Center a anuncia esaki, mustrando cu e bientonan sosteni di Alex ta na 137 km/h.

Alex ta ubica como 500 miya zuid di Faial Island, den Azores, moviendo noord-noordoost cu velocidad di 32 km/h.

Hurricane Warning a wordo emiti pa e islanan di Faial, Pico, Sao Jorge, Graciosa, y Terceira den e centro di Azores.  Mirando e coriente fuerte cu ta alimentando Alex, tin chens cu parti di centro di Azores lo experiencia tromenta di Tormenta Tropical of di Horcan.  Cu awacero pisa y ola bruto, e solo hecho cu un horcan lo pasa eybanda den e temporada di aña aki mes ta hopi inusual. Algo cu ta pasa 1 biaha cada 10 pa 20 aña.

Den historia, bayendo bek te na 1851, solamente dos horcan a yega di pasa den Atlantico durante luna di Januari.  Uno cu no tabatin nomber, cu a bira Horcan Uno dia 4 di Januari 1938, y Horcan Alice cu a mantene forza di horcan di 31 December 1954 te cu 4 Januari 1955.  Alice a yega cu biento te na 128 km/h, pues Alex ta oficialmente e Horcan mas fuerte di tur tempo cu a nace den Januari den Atlantico.

Pero e ta un Horcan frieu.  Apenas Diaranzon el a haya forma di un Tormenta Subtropical.  Awaceronan torencial den e tormenta rond di e wowo, a socede na forma asombroso pasobra e temperatura di lama bao di Alex ta solamente entre 20º pa 22º Celsius.  Aunke esakinan ta como 1º Celsius mas halto promedio pa e temporada aki di aña… tog nan ta hopi mas frieu cu loke ta rekeri pa desaroyo di ciclon tropical.  No obstante, tempoeratura di nivelnan mas halto cerca di Alex ta inusualmente frieu pa e latitud, y esey nifica cu e instabilidad (debi na e contraste entre nivelnan cayente y humedo mas abao, y nivelnan frieu y seco mas na halto) ta mas halto cu normalmente e lo ta.  E instabilidad aki ta permiti awacero y lamper cu strena sigui desaroya y consolida, reforzando e nucleo cayente cu ta pone Alex bira un Horcan, envez di djis un Tormenta Extratropical of Subtropical.

E bida di Horcan Alex lo bay ta uno cortico.  E sistema ya ta acelerando rumbo panort, y pa awenochi e lo por ta djis un tormenta tropical bek cu ta sigui move rumbo pa Groenland.

Pues Horcan Alex no ta forma peligro pa Caribe, ni pa Aruba.

 

Next Post

Minister Schwengle ta boga pa mas hende siña reanimacion basico

EMERGENCIA ORANJESTAD(AAN): Diaranson Minister dr. Alex Schwengle, kende ta specialista di pulmon, a yuda salba bida di un persona cu a haya un ataca di curazon uzando tecnicanan di reanimacion basico. E mandatario a bisa cu esaki tabata un situacion di urgencia hopi specifico. Minister Schwengle a bisa cu p’e […]