Adultonan Mayor cu entrada no ta surpasa Afl.30.000 pa aña ta wordo saca di e sistema di impuesto

The content originally appeared on: Diario

Parlamentario Raymond Kamperveen

*no mester sigui yena un formulario di “aangifte inkomstenbelasting” tur aña

ORANJESTAD (AAN): Durante reunion di 18 di december 2023, den sala di Parlamento pa tratamento di presupuesto 2024, Parlamentario y miembro di fraccion Raiz, Raymond Kamperveen, a entrega dos mocion na beneficio di nos Adultonan Mayor.

   Den e prome mocion Parlamentario Kamperveen ta boga pa nos Adultonan Mayor cu ta ricibi 1 of 2 pension, na unda e entrada no ta surpasa Afl.30.000 pa aña, cu ta e “belasting vrije bedrag”, pa nan wordo saca di e sistema di impuesto pa asina nan no tin cu sigui yena un formulario di “aangifte inkomstenbelasting” tur aña.

   E di dos mocion ta urgi Gobierno pa sondea e posibilidad pa duna nos pensionadonan riba e edad di 80 aña, un despensacion di mester paga impuesto di entrada, pa asina duna un alivio financiero na un grupo chikito di Adulto Mayor.

   Parlamentario Raymond Kamperveen desde cu a drenta den Parlamento ta buscando diferente manera pa mehora e calidad di bida di nos Adultonan Mayor y tambe ta sigui ofrece solucionnan practico pa haci nan bida mas facil.

   E mocionnan a wordo aproba unanimamente.