A pospone temporalmente tur operacion regular di Hospital

The content originally appeared on: Diario

Minister Dangui Oduber

*Debi na e capacidad di cambernan ta limita 

ORANJESTAD (AAN):  Minister Dangui Oduber ta informa cu Dr. Horacio Oduber Hospital (HOH) a pospone temporalmente tur operacion regular di hospital. E decision aki ta debi na e capacidad actualmente di e cambernan, cu ta limita.

            Esaki ta bin door di entre otro trabounan di construccion cu ta tumando luga na hospital, ma tambe door di un subida di personanan cu mester wordo interna cu urgencia door di accident of malesa.          Pa duna prioridad na e cuido y bienestar di pashentnan cu ta yega HOH cu urgencia y cu mester opera urgente, a dicidi pa pospone temporalmente e operacionnan regular di hospital.

            Mientras Hospital ta traha pa atende cu e restriccion di capacidad, Minister Dangui Oudber kier enfatisa na pueblo e importancia di mantene bo salud. Ta crucial pa pone atencion na prevencion contra sintoma di griep y pa mantene habitonan saludabel manera;


Come cumindanan nutritivo
Participa den ehercicio regular
Duna prioridad na bo salud mental
Bebe vitamina
Bebe hopi awa
Elimina sucu excesivo
Elmina alcohol excesivo

            Di biaha Minister Oduber ta tuma e oportunidad pa recorda pueblo, awo cu nos ta den e temporada di Carnaval, pa keda hidrata y evita consumo di alcohol den exceso. Bo seguridad y e seguridad di otro ta di suma importancia.

            Minister Oduber ta conta cu pueblo su comprension, cooperacion y compromiso cu bienestar di henter comunidad durante e periodo di Carnaval. Minister Oduber ta termina bisando cu e ta desea cada un persona pa tin un bon salud & y corda ariba seguridad di un y tur.