A aproba proyecto pa traha cura pa 4 scol

admin

Minister Michelle Hooyboer: Un inversion di mas di 1 miyon florin

A aproba proyecto pa traha cura pa 4 scol2
A aproba proyecto pa traha cura pa 4 scol1

ORANJESTAD    (AAN): Recientemente a tuma luga e firmamento di financiamento pa e construccion di curanan sigur y duradero pa cuater scol. E proyectonan ta wordo financia pa medio di Fondo Desaroyo Aruba (FDA).  E proyectonan aki ta sumamente importante pa e scolnan pa asina por garantisa un miho situacion di siguridad pa e alumnonan y e docentenan.

   E construccion di curanan sigur y duradero ta envolve cierto costonan significante, pero ta esencial pa preveni e entrada di personanan no autorisa riba e terenonan di scol, y ta un medida pa mantene e muchanan riba tereno di scol, unda cu e mayornan por sinti nan trankilo cu nan yiunan ta bon cuida.

    E proyectonan di “afrastering/omheining”pa Pius X na Dakota, Scol Cacique Aterima y SPO na Santa Cruz y Ayo Kleuterschool ta costa mas di un miyon florin. E construccion ta programa pa tin un duracion di 40 dia, y pues prome cu aña 2016 caba e scolnan lo tin nan cura nobo.

    Minister di Enseñansa Michelle Hooyboer-Winklaar a haci uzo di e oportunidad di e firmamento di e proyectonan pa trece  hunto tur e gruponan di interes (stakeholders), esta e cabesantenan di scol, DOW, schoolbestuurnan y e contratistanan pa papia tocante di e proyectonan, y intercambia informacion tocante di e trabao den su totalidad.

    Un bon cura, duradero y sigur ta mesun importante cu un edificio, y klasnan bunita y sigur; e ta parti di e infrastructura esencial pa un scol por funciona y brinda e maximo siguridad na e team di docentenan, y nan alumnonan, segun Minister Hooyboer-Winklaar ta splica. E ta un tema bastante discuti den e ultimo añanan, y e proyectonan pa omheining ta riba e lista di trabaonan importante cu ta pendiente na diferente scol.

    Aruba tin mas di 80 scol cu pa añanan largo no a haya mantencion na tempo, y tampoco tur cu mester a ricibi nan renobacion adecua, y e lista di trabaonan necesario ta largo. Pero cu determinacion y creatividad ta logrando pa e cambionan y mehoracion infrastructural di e scolnan wordo adresa.

   Minister Hooyboer-Winklaar ta sumamente contento cu e sosten di FDA pa asina logra den e mesun siman firma pa e renobacion di un scol mas, esta Rosa College, y pa e construccion di curanan di scol pa cuater scol.

 

Next Post

Abuso di mucha lo haya debido atencion den tratamento di Codigo Civil

Minister Paul Croes: ORANJESTAD     (AAN):   Durante e tratamento di e Codigo Civil nobo den Parlamento di Aruba den e simannan nos dilanti e topico di Abuso di mucha tambe lo haya su debido atencion, esaki Minister di Asuntonan Social a expresa den un entrevista recien.    Den e buki number […]