Segun Francis Quandt Hefe Departamento di Keur:
ORANJESTAD (AAN): Segun ley, tur vehiculo di motor cu ta core riba caminda mester tin seguro, number di auto valido y ta gekeur. Sinembargo, hopi ciudadano ta core nan vehiculo sin e documentonan valido. Specialmente, sin nan vehiculo gekeur. Esaki sigur ta motibo pa polis duna boet.
Señor Francis Quandt, Hefe di Departamento di Keur, den un entrevista recien cu DIARIO, a indica cu den e temporada aki e citanan pa keur ta aumentando hopi. Segun e, esaki ta debi na control pisa di polis. Sinembargo, el a remarca, asina mes cu ta traha cita y paga, hopi no ta presenta na DTI pa keur nan auto.
Un di e retonan cu keurmento di auto mas grandi cu tin actualmente, ta e tipo di luznan, entre otro di color, cu no ta permiti. El a splica cu segun acuerdonan standarisa di tur pais, fabricanan ta traha vehiculonan cu cierto tipo di luz standard. Den caso cu un ciudadano acudi pa keur su auto y tin luz berde riba dje, e ta wordo afgekeurd di biaha pasobra esaki no ta cuadra cu e ley cu nos tin. Mescos ta pasa tambe cu e luz di señal, brake, reverse entre otro, mester ta e colornan segun acuerdonan standarisa y segun nan ta bin di e fabrica.
