79 Miyon pa hamber, 1.6 Biyon pa cinco strea y 30 Miyon pa Sasaki

The content originally appeared on: Diario

Un analisis di tres rapport di e controlador di placa di Aruba — *A scrap posibel control di Reino y di Parlamento riba 1.6 Biyon — *30 Miyon pa Sasaki a bira trabou pa Ministerio Publico y Huez

ORANJESTAD(AAN)- Ora Algemene Rekenkamer Aruba papia, mester scucha y lesa. Ta trata aki di e Colegio Halto di Estado, cu mester percura pa tur placa di Pueblo wordo gasta manera Ley ta exigi.

Algemene Rekenkamer Aruba ta e consehero grandi di Parlamento pa Parlamento por traha manera ley ta exigi y pa Parlamento tene su mes na tur regla hancra den e realidad di Estado di Derecho di Aruba.

Ta tristo, sinembargo, mira con miembronan di Parlamento no ta atende cu e rapportnan di Algemene Rekenkamer Aruba na e haltura cu nan mester wordo trata.

Ora lesa e Rapport di Algemene Rekenkamer Aruba riba e forma cu FASE a wordo atende, ta mira cu e Colegio no ta parti di un neishi politico, pero un Colegio cu ta basa su mes completamente riba Ley y mester tin integridad halto den su bandera.

E rapport ta papia di e circumstancianan den cual FASE a nace pero tambe riba loke mester wordo coregi pasobra ta habri caminda pa cosnan bay robez si no tene estrictamente na ley.

E rubrica “Analisis” a wordo introduci dor di DIARIO, sigur pa tambe asegura pa Aruba comprende funcionamento di un pais democratico y e sistema cu nos mester wordo goberna.

Ora nos papia di e rapport di FASE na discusion, nos ta papia di un rapport cu nos mester pone sigur banda di dos rapport cu nan a presenta cu ta e rapportnan riba e proyectonan “Bo Aruba” y e rapport cu nan a traha riba e “Fondo Desaroyo Nobo San Nicolas”.

Den e tres rapportnan aki por mira con Algemene Rekenkamer Aruba ta controla con den placa di Pueblo ta wordo gasta den plannan cu gobernantenan politico ta introduci.

Pa nos bay na e prome rapport di Algemene Rekenkamer menciona den nos titular, nos ta topa cu e rapport riba e “Fondo Desaroyo Nobo San Nicolas”, naci di Plan Sasaki.

Aki ta trata di un fondo di 30 Miyon di tempo di gobierno di Henny Eman di AVP, cu no tabata tin aprobacion di Parlamento di Aruba.

E investigacion di Algemene Rekenkamer Aruba a duna prueba con na un forma contra bienestar di Aruba y contra reglanan pa gasta placa di Aruba, a introduci proyectonan cu riesgonan grandi pa e pais.

Resultado tabata un caso penal, cu a haci cu tres Ministro a wordo sentencia dor di Huez. Ministerio Publico a bay contra e hecho cu Prome Ministro Henny Eman no a wordo castiga mientras cu e tres ora Ministronan a bay contra nan sentencia.

E caso a muri ripiente na momento cu Mike Eman tabata prepara pa eleccion, cu a haci su persona Prome Ministro di Aruba.

E proyecto grandi di Mike Eman tabata e 1.6 Biyon pa realisa e proyecto di “Bo Aruba” pa cual e mayoria di AVP den Parlamento a entrega Gobierno di Mike Eman un fondo di 1.6 Miyon pa gasta sin control di Parlamento y sikiera di Reino.

Na 2017 Algemene Rekenkamer Aruba a entrega su rapport cu prome cu eleccion di 2017 a keda den lachi di Minister Benny Sevinger, cu hunto cu Mike Eman tabata dicidi riba e proyectonan manera e rapport ta bisa.

E rapport a drenta mundo di olvido y awe Aruba ta den turbulencia pasobra durante e pandemia cu a ataca Aruba, a uza 79 Miyon pa e grupo mas pober di Aruba come.

Awe turbulencia ta yena Aruba. Politiconan di oposicion ta grita. Ta berdad cu mester coregi loke por considera peligroso of contra bienestar di Aruba.

Pero awe nos ta termina cu pregunta den un panorama cu a bolter na Aruba.

E grupo cu awe kier pa ley y nada mas cu ley wordo practica den FASE , a entrega e 1.6 Biyon na Mike Eman pa “Bo Aruba”.

Kico nos mester conclui? Kico tin mas balor? E hamber di hende of e careteranan di Aruba pa no papia mes di e tram y e fietspad, cu ni Reino por controla?

Awe ley ta sostene FASE. Hamas Ley por sostene loke a pasa cu rapport “Bo Aruba” aproba pa Parlamento di e tempo.