52.4% di nos hobennan entre 10 y 13 aña tin problema pa controla nan mes y nan emocion

The content originally appeared on: Diario

Parlamentario Misha Raymond di Raiz

ORANJESTAD (AAN): Misha Raymond, Parlamentario y lider di Fraccion Raiz, a urgi Gobierno pa expande e team di cuido cu mas trahadonan social na scolnan, un mocion cu a logra aprobacion unanime den e organo mas halto di Aruba.

E parlamentario tambe ta boga pa duna e trahadonan social un estudio extra, conoci como ‘cognitief gedragstherapeutisch werken’, cu tin como meta: yuda stimula cambio den comportacion di e mucha.

Den un estudio publica recientemente titula ‘Calidad di bida di hubentud di Aruba’, a sali na cla cu 52.4% di nos hobennan entre 10 y 13 aña tin problema pa controla nan mes, y nan emocion. Presentando e mocion aki Misha kier logra pa haya mas trahado social den e ramo y cu nan ta miho ekipa pa asina por fortifica nos prome liña di cuido y yuda nos mucha y hobennan mas trempan, pa asina tambe baha nos listanan di espera.

E mocion ta boga gobierno pa dentro di 6 luna presenta un proposicion, na Parlamento di Aruba, con lo percura pa expande e team di cuido di trahado social na scolnan. Tambe e ta urgi gobierno pa sondea e posibilidadnan di co-financiamento haci pa organisacionnan social y asina sigura cu ta sigui profesionalisa e teamnan di cuido.