21 salario pa representa 110 Mil habitante di Aruba

The content originally appeared on: Diario

Gremionan mester presta atencion na gastonan silencioso

*Casi 25 porciento di poblacion no ta den edad productivo

*Representacion den exterior no ta papia di falta di placa 

ORANJESTAD(AAN)—Kico ta e problema grandi pa atende na forma adecuado cu e parti financiero di Aruba como pais?

E prome problema ta cu tur bista generalmente ta dirigi riba loke gobernacion na mando ta haci y no riba e realidadnan cu ta dicidi kico ta e posibilidad financiero real di e pais.

DIARIO pa por describi asuntonan serio cu ta tranca movecion pa bay dilanti na e pais, ta sigui studia e Miles di pagina cu a wordo dedica na e topico pa baha gasto di e pais, cu tin problemanan structural cu ta basa riba pensamento general di loke ta politica, di loke mundo politica mester ta y mester produci.

Relatonan di Caft ta bini cu cierto ponencianan cu no ta haya suficiente atencion ora ta papia di loke mester tene na consideracion ora ta papia di e forma cu comunidad ta gasta placa.

“E placa no ta bini di Gobierno ni ta favorece Gobierno pero henter un comunidad, cu Gobierno mester dirigi na e miho forma posibel” informantenan clave ta trece dilanti.

Hunto a studia relatonan importante di entre otro Caft, cu ora el a ilustra kico e pandemia Covid-19 a haci cu Aruba, a mustra con hasta den e tempo cu Aruba tabata tin mas entrada na por ehempel 2010, ainda Aruba tabata tin un balansa negativo pa su entrada y gastonan.

Informantenan experto ta mustra, cu ora ta papia di baha gasto ta sigui landa den piscinanan limita sin kier drenta e oceano di aspectonan fundamental cu ta hunga un papel na Aruba.

Ilustrativo pa ponencian cu ta indica pakico Aruba tin problema pa biba cu e placa cu e pais por produci na belasting realmente, ta e cantidad di Miembro di Parlamento cu ta ricibi un salario completo cu tur beneficio cu ta for di limite di normalidad pa Aruba.

Manera informantenan ta trece dilanti Aruba tin un poblacion di alrededor di 110 Mil habitante, di cual casi 25 porciento ta sea bou di 15 aña di edad of riba 65. Pues por papia di un poblacion productivo sumamente limita cu mester percura pa financiamento di un Parlamento cu ta consisti di 21 persona, cu un salario di alrededor di Diez Mil Florin pa luna y cantidad di beneficio.

Si mira e gastonan cu Aruba tin pa cubri cu su Parlamento, por realisa cu tin algo robes.

Aparentemente pasobra ta tur partido practicamente ta inclui den Parlamento, no ta atende cu e asunto aki manera mester ta, segun expertonan.

Na nan opinion si Parlamento mes no por cuminsa mira su realidad, ta dificil pa papia di cambio sigur despues cu den pasado Parlamento a permiti e creacion di debe nacional y gastonan enorme cu na 2014 a haci cu Hulanda a mishi cu autonomia financiero di Aruba, cu tabata un responsabilidad hancra den e fundeshi di Parlamento.

Informantenan a papia di e gastonan pa biaha na reunionnan manera di Parlatino y otro organisacionnan den exterior, cu ta sumamente discutibel si realmente kier yega na solucion.

DIARIO ta sigui cu su esfuerzo pa presenta realidadnan basico cu aparentemente mester wordo lubida, ora ta papia di solucionnan permanente pa e problemanan financiero di Aruba.