2021 a confirma Evelyn Wever-Croes como lider di decada!

The content originally appeared on: Diario

Den maneho firme di crisis el a ricibi sosten di mayoria di voto personal — *E ta figura central den sobrevivencia di Aruba den mayor crisis di siglo — *2021 a habri porta pa recuperacion autonomia despues di atentado 2011

ORANJESTAD (AAN) — 2021 ta yega na su fin. Analisis di 2021 ta cuminsa

Nos a analisa cifranan, analisa tur material necesario, pa por presenta Aruba e analisis di 2021, cu ta cera un decada for di e momento cu na 2011 casi a mata futuro pa Aruba.

Na 2011 un trampa politico a drenta historia di Aruba.

Na 2011, cifranan tabata indica cu Aruba a perde mitar di su entrada na BBO. Cifranan, hancra den e historia financiero di Aruba, ta duna prueba con e pais tabata perde su forsa financiero y asina su autonomia financiero.

Na mes momento Aruba a bira dependiente di prestamo di placa pa cubri debenan cu Aruba no por a paga.

Autonomia ta e boz legitimo di un pais cu ta liber y cu no ta depende di otro pa cubri su gastonan.

Na 2011 Aruba no por a papia mas. Aruba no por a confronta Reino, manera a keda demostra na 2014.

Aruba a wordo ciega pa e hecho cu asuntonan financiero nacional hopi bez ta dificil pa hende cu no ta bon conoci cu e materia, mira. Manipulacion politico den cual entre otro a uza Citgo di Nicolas Maduro, ta prueba di loke a pasa cu Aruba y cu por wordo proba cu cifra, cu rapport, cu realidad.

Evelyn Wever-Croes a acepta mando di un pais bancarota na 2017. E cifranan cu Gobierno Mike Eman a laga atras, a pone Reino hari pero tambe exigi un gobierno cu man fuerte di Evelyn Wever-Croes.

No tabata tin otro salida y Evelyn Wever-Croes a haci loke un lider cu concenshi mester haci. El a tuma medida pa scapa autonomia di Aruba cu no tabata existi mas.

Na 2020, Covid-19 a destrui economia di Aruba, cu mester a pidi yudansa di Reino.

E problema no tabata yudansa pa Covid-19 pero si pa Hulanda duna placa pa cubri e debe nacional, cu Mike Eman a admiti cu el a crea.

2021 a yega cu yudansa pa Aruba, cu a cuminsa traha riba su recuperacion.

E variante Delta a drenta.

Gobierno Wever-Croes no a hala atras y a sigui traha mientras ya el a anuncia dos proyecto grandi.

2021 a yena Aruba cu berguensa tambe.

Escandalonan di corupcion a rementa.  Pa prome bez den historia un Miembro di Parlamento a wordo eligi mientras e ta den prison.

Eleccion a bira un wega pa oposicion y te awe ta spera un investigacion di e realidad cu resultado di eleccion a cay den man di AVP, cu tabata tin den su man voto secreto di ciudadanona, manera Huez a indica.

Den turbulencia mundial y local historico, Evelyn Wever-Croes a para fuerte y haci husticia na Pueblo di Aruba, cu no tin placa pa sigui gasta.

Na 2021 Evelyn Wever-Croes a gana eleccion.

Na 2021 Evelyn Wever-Croes a trece proyecto cu hopi pais kier pa reanima economia. Un proyecto di un compania Mericano, cu ta mara na reglanan comercial internacional na Merca.

Aruba no a conoce desesperacion na 2021, manera ta e caso na hopi pais, pasobra Aruba tabata tin un lider cu a dicidi pa e contenido di 2021.

Teniendo cuenta cu na 2011, ya e fundeshi di futuro di Aruba a wordo kibra, na final di 2021, Evelyn Wever-Croes a bira e lider di decada di Aruba.

Pa democracia por ta autentico, un Gobierno mester a sirbi interes di e pais y su votadornan. Pa autonomia por ta realidad, e pais mester a adapta na sistemanan cu ta haci e pais financieramente independiente of sikiera menos independiente posibel di ayudo di Hulanda of cualkier otro pais.

E maneho financiero di Gabinete Wever-Croes ta habri caminda pa autonomia financiero, cu ta base di autonomia estatal.

Den un 2021 di pandemia mundial, caida financiero y economico di paisnan chikito y menos crecemento economico cu paisnan grandi a spera, mester yama Evelyn Wever-Croes uno di e lidernan mas grandi cu historia moderno di Aruba a produci!