18 aña di prison pa pareha cu a asesina Frans Angela na forma cruel na Zeewijk

The content originally appeared on: Diario

Acusado Jafet a grita ora Hues a bisa e castigo

ORANJESTAD (AAN): Diabierna mainta Hues a dicta sentencia den e caso penal cu Ministerio Publico a cuminsa contra e homber Arubiano Jafet Cabrera Baez (23) y e muher Dominicano Walkidia Winterdaal (34). E sentencia a bay via video conference. Den sala di Corte tabata presente e famia di e victima Frans Angela y tambe e tata di Jafet. 

FISCAL A EXIGI CASTIGO PISA

            Luna pasa tratamento di e caso a tuma lugar caminda Fiscal a bisa cu e caso aki a shock henter comunidad y famia. Fiscal a bisa Hues cu J.B. y W.W. a asesina Frans Angela 79 aña na un forma hororoso. A drei e garganta y kibra nek, a pasa auto riba cabez y curpa di e victima. Fiscal a bisa cu segun patologo, Angela a sufri masha hopi pasobra posiblemente ainda e tabata na bida ora a pasa auto riba dje y e no por a haci nada pa defende su mes.

            E caso aki a shock henter comunidad y famia. El a mustra riba e miembro di Recherche cu a yega eynan y mira su welo morto. Fiscal a tuma na malo con na un forma hororoso y a mata e victima. El a mustra con J.B. a splica den detaye con el a drei garganta y kibra nek y despues pasa auto.

   Fiscal a exigi pa J.B. 25 aña di prison y pa W.W. 22 aña di prison.

   Despues di a exigi castigo tanto W.W. como J.B. a perde cabez. Promer tabata W.W. cu a cuminsa grita y yora sin fin. Despues tabata J.B. kende a perde cabez y 4 miembro di CEA a atende cun’e y hib’e patras den e parti di celnan, caminda por a scucha ainda con e tabata grita. 

SENTENCIA

Ayera mainta Hues a bisa cu e kier pa e acusadonan ta den un oficina separa. Esaki tambe a sosode promer cu el a dicta sentencia. Aparentemente a tuma medida pa evita loke a pasa den sala di Corte, caminda e pareha a perde cabez.

   Hues a bisa cu e ta haya legalmente proba cu J.B. y W.W. premedita a asesina señor Angela. 

ASESINATO CRUEL

Hues a bisa cu pa cu e castigo, e ta tene cuenta cu e forma cruel cu a mata Angela. Hues a bisa cu no por imagina con e ultimo minuut di bida di Fransico tabata. A laga famia cu tristeza. 

HUES A BAHA CASTIGO EXIGI

Hues a bisa cu e tambe ta tene cuenta cu e raportnan di psychiater cu ta haya J.B. y W.W. menos responsabel pa loke nan a haci.

   Hues a condena J.B. y W.W. na 18 aña di prison. Nan mester paga un parti di e gastonan di entiero y si e famia ta desea, e por cuminsa un caso civil pa exigi e resto. 

ACUSADO A CUMINSA GRITA

Despues cu Hues a bisa e castigo, por a scucha e acusado J.B. grita masha duro. Esey ta mustra cu aparentemente el a bolbe perde cabez. 

TATA DI JAFET A PAPIA CU HUES

Despues di e sentencia, e tata di J.B. a pidi pa e papia cu Hues. Para den sala di Corte el a pidi Hues pa tene cuenta cu su yiu J.B. no ta bon di cabez. Hues a splica cu tata, cu e Hues cu a atende e caso, a tene debido cuenta cu tur loke e tata ta splicando Hues. Hues a bisa e tata tambe cu no mester lubida cu J.B. na un forma hororoso a kita bida di tata di un famia.