1323 persona a acudi pa tuma nan prome, di dos y un ‘booster-shot’ di vacuna

The content originally appeared on: Diario

ORANJESTAD (AAN): E siman aki, DVG ta dunando chens pa tur hende di 55 aña bay ariba, pa nan busca e ‘booster-shot’ di e vacuna di Pfizer-BioNTech contra Coronavirus. 


Tanto Diamars, Diaranson, y Diahuebs bo por djis yega y busca e di 3er dosis aki na Centro Deportivo Betico Croes na Santa Cruz. Riba prome dia un total di 1323 persona a ricibi sea nan prome, di dos of nan booster shot. Segun DVG, mayoria tabata pa haya e booster shot.

   Manera tabata di spera, e mainta aki tabata yen di hende un biaha mas, di cual algun a warda hasta mas di 2 ora prome cu a logra haya nan vacuna.  Dado momento e rij a yega te den e parkinglot full pabao di e edificio.

   Personal di DVG a demostra cu nan ta contento cu e reaccion aki, y ta spera cu mas publico cu ta 55+ di edad lo por probecha tambe awe Diaranson y Diahuebs pa haya e proteccion extra aki.

   Corda bay cu bo Zorgpas di AZV y depende ki ora di dia bo bay, tin chens cu bo ta haya rij largo.  Como cu e grupo di edad aki ta sensitivo pa paramento largo den rij, ta bon pa bay cu un sombre of algo pa tapa solo, djis por si acaso.  Como cu e dianan aki tin hopi menaza di awacero, kizas un paraplu no por faya.