Home » Latest News » Obesidad infantil: Genetica of mal habitonan?

Obesidad infantil: Genetica of mal habitonan?

Contribucion di Salud sin Fronteras:

ORANJESTAD (AAN) – E specialista Endocrinologo Pediatra dr. Adriana Jaramillo, di Clinica Las Americas, den un contribucion di Salud sin Fronteras, a aporta pa Matutino DIARIO un interesante informacion, titula “Obesidad Infantil: Genetica of mal habitonan?”

E spcialista ta relata lo siguiente: “Constantemente nos ta puntra nos mes ta kico ta pasando den nos sociedad cu cada bez nos ta birando mas obeso, nos ta hiba un ritmo di bida acelera for di infancia, nos ta resta importancia na e desayuno pa e solo hecho di ta ‘extremadamente tempran pa come’ y nos ta prefera empaca den e lunch box di nos yiunan bebida cu sucu, paki buscuchi y cuanto cuminda procesa, pasobra nos no tin tempo di cushina algo sabroso y nutritivo.

Nos no ta empaketa mas fruta y sirbi salada y berdura den e cumindanan pasobra ‘e muchanan no kier come esey’. Nos ta give up for di e prome contactonan cu e alimentonan y simplemente, nos no ta intenta mas, talvez cu e idea cu ora nos yiunan bira adulto nan lo come fruta y berdura.

Ora nos ta bin ripara cu nos yiunan tin sobrepeso of ta obseso caba, nos ta wak nos mes y ta keda trankil pensando cu ta herencia, cu den e famia nos ta “di curpa yen” of simplemente, nos ta spera cu ora e pubertad yega nan bira halto y por arte di magia e kilonan di mas lo disparce.

Na unda e fondo di e asunto ta? Nos ta herede obesidad of nos ta hereda e habitonan cu ta hiba nos na esey? E contesta ta ambos cos.

Nos por tin cierto predisposicion genetico pero si nos ta transmiti na nos yiunan cu nos ehemplo mal habito di alimentacion, sedentarismo, bida yen cu stress, poco tempo di ocio y descanso, nos ta condenando nan na sufri di obesidad, malesa cardiovascular, diabetes of cancer.

Ta ora pa spierta! Di ser conciente di nos papel como mayornan y ainda prome di sali na estado, pensa con nos kier nutri nos yiu for di e gestacion, con por transmiti salud for di e lactancia materno y un inicio sano di e alimentacion complementario, unda fruta y berdura ta hunga un papel protagonico.

Ya ta ora di duna bon ehemplo na nos yiunan cu e practica regular di actividad fisico, sali cu nan cama, bay keiro, hunga un partido di futbol, basketball, of alomenos stimula nan pa busca un deporte cu nan gusta.

Ban stop di kere cu tempo lo cambia e estado di salud actual di nos yiunan. Nos mester actua awo y no ora ta mucho laat. Ban desayuna den famia, ban haci di fruta y berdura un alimento imprescindible, laga nos uza productonan fresco di bon procedencia, laga nos tin productonan pa prepara cuminda saludable y laga atras e alimentonan procesa. Ban busca espacionan di ocio, recreacion y deporte, ban crea habitonan y rutina di descanso y oranan di soño suficiente for di e infancia.

Nos no por cambia e parti genetico pero si nos por modifica su expresion door di enfrenta nos mes na un ambiente generador di salud y bienestar”.