Home » Latest News » Movimento Raiz ta organisa un “nature walk & talk”

Movimento Raiz ta organisa un “nature walk & talk”

Diadomingo awor

ORANJESTAD  (AAN):  Desde cu movimento RAIZ a lanta cabes dos luna pasa, hopi ta esnan cu ta sinti nan mes afilia na e movimento aki, compartiendo mesun vision y ideanan. Pa pone echo na palabra, RAIZ lo tin un Nature Walk & Talk mañan diadomingo, saliendo for di Centro di Informacion Parke Arikok pa 7:00am di mainta. Bou guia di un park ranger, lo sali bay rumbo pa plantacion Boca Prins. Durante caminda lo haya diferente informacion tocante Aruba su flora y fauna y lo ta bay tin oportunidad tambe pa conoce e miembronan di RAIZ mas di cerca.

“Ban cana y combersa cu otro mey mey di naturalesa”, candidata Liliana Braamskamp-Erasmus di RAIZ ta sugeri. “Despues di a biaha pa 3 siman den exterior, unda mi a combersa extensivamente cu e.o. fundadora di Rights of Nature, señora Natalia Greene, mi ta sinti mi mes mas cu nunca, yama pa para firme pa nos naturalesa. Nos ta invita tur hende cu kier sa mas tocante preservacion di nos isla, conservacion di nos propio identidad, turismo sustenibel, maneho di desperdicio… tanto topico cu mester nos atencion, pa join nos diadomingo mainta awor. Ban combersa di e retonan cu nos ta confrontando, pero mas importante ainda, di e posibilidadnan nos dilanti.”

E caminata lo sali 7:00 am y lo ta encera un contribucion di AWG. 5,- pa persona (cu no ta miembro di e parke) cu lo bay completamente pa fondonan di nos Parke Nacional Arikok. Ta recomenda pa bin cu sapato comodo pa cana y tambe pechi of sombre. E caminta lo caba alrededor di 9:00 am na Plantacion di Boca Prins.

“Nos ta contento di tin entre otro Liliana den nos team”, Lider di partido Sr. Arends a agrega. “Su admiracion y dedicacion pa nos naturalesa ta sigur algo cu nos por siña di dje. Naturalesa ta algo sigur cu mester haya su bos den e proximo gobernacion pa asina e siguiente generacionnan tambe por gosa di nos dushi flor y fauna.”

Cu hopi energia y cla pa ranca sali, RAIZ ta warda pueblo di Aruba pa cera cabes y lanta ariba, diadomingo awor, dia 13 di augustus pa 7’or di mainta. Nos ta topa na r Centro di Informacion di Parke Arikok.

Keda pendiente y sigui e ultimo desaroyonan di RAIZ: ‘Like’ nan Facebook Page RAIZ Aruba, comparti bo comentario, preocupacion o sosten. Pronto tambe via nan website www.raizaruba.com