Home » Latest News » Minister Yrausquin cu un gradicimento grandi pa Mart van Bracht di TNO

Minister Yrausquin cu un gradicimento grandi pa Mart van Bracht di TNO


ORANJESTAD(AA N)– Minister Plenipotenciario Juan David Yrausquin tabata tin palabra di elogio y gradicimento pa Mart van Bracht na su despedida como Managing Director Energia na TNO. Den e funcion aki sr. van Bracht tabata tin e responsabilidad final pa TNO Caribbean Branch na Aruba.

Sr. Yrausquin a gradici Mart van Bracht den nomber di gobierno di Aruba, pa e hecho cu bou di su liderazgo e establicimento di TNO na Aruba e crece y asina brinda trabao na hopi profesional Arubiano hoben. Tambe den su discurso e mandatario a enfoca riba e papel importante cu TNO a hunga den realisacion di e vision y ambicion di gobierno di Aruba pa yega na un sociedad mas sostenibel. ‘TNO a demostra cu Aruba por fungi como hub entre Europa y Sur America. ‘Boso presencia na Aruba ta pa nos e ehempel concreto y importante di e potencial di e concepto di Gateway,’ asina sr. Yrausquin a bisa.

Minister Yrausquin a bolbe subraya e rol importante cu TNO a hunga den realisacion di e Smart Community Aruba, cu ta un “real life lab” unico pa Aruba y pa Caribe.

Por ultimo e mandatario a gradici Mart van Bracht pa su apoyo pa Aruba y su vision. ‘Den e ultimo añanan bo tabata un embahador pa Aruba den su intento pa realisacion di un comunidad sostenibel na 2020.’

Despues di su discurso minister Yrausquin a haci entrega di un regalo na Mart van Bracht como  aprecio di Aruba pa su persona y pa su sosten na nos pais.

 

Nota pa redacion: Potretnan ta di Gabinete di Aruba