Home » Latest News » Minister Oduber a enfatiza riba desaster grandi den DIP

Minister Oduber a enfatiza riba desaster grandi den DIP

Practicamente ta habri un porta hancho di corupcion

ORANJESTAD (AAN):  Minister di Infrastructura y Medio Ambiente sr. Otmar Oduber a splica durante un conferencia di prensa cu e desaster den departamento di DIP ta asina grandi na e momentonan aki, cu nan no por midi ainda kico of con grandi e daño ta pa comunidad di Aruba.

El a indica como ehempel, den otorgamento pa loke ta trata terenonan, normalmente ta wordo poni cu un 5 promil di e suma cu ta wordo inverti, mester wordo duna na un instancia social of educativo, pero den ultimo añanan a para bira cu tabata instrui ambtenaarnan rond di Minister y esnan cu ta haya un tereno pa manda esaki cerca cierto persona, riba cierto cuenta y suma. Segun Minister Oduber, practicamente ta habri un porta hancho di corupcion, caminda ta uza propiedad di tereno di pueblo pa haci politica cune. Y e ta papia di miyones den ultimo ocho aña!

E ta pidi comprension di pueblo pasobra tur cos ta para na DIP den momentonan aki pasobra e desaster ta grandi mientras cu ta haci inventarizacion di e situacion.

Den futuro nan kier lanta un fundacion, caminda nan mester raporta na un manera corecto, tur suma cu ta wordo ricibi y cu ta bay na instancianan caritativo, cu tambe ta duna relato di loke nan ta haci cu e placa. Y no manera esaki a bay manera un regalo of un fabor di e politico, pasobra bo a yud’e cu un tereno y bo ta haya cierto placa pa bo haci campaña cune.

Minister Oduber a bisa cu el a tende oposicion ta keha den ultimo dianan riba checknan por ehempel di airport cu su colega Dangui Oduber y Evelyn Wever-Croes a reparti a base di un maneho cu tin di sponsorship di N.V., y esaki tambe tabata tuma lugar den su tempo como Minister, y nan mes a bisa cu no tin nada robez cune, y awo nan ta keha riba dje, pero e tempo ey, e ta imagina cu tabata trata di un suma di rond di 4 pa 5 miyon si no ta mas cu e Minister y ambtenaar tabata dicidi ken ta haya regalo na Aruba, riba cuenta di banco directo! Esaki ta cosnan cu e gobierno aki ta bay caba cune.