Home » Latest News » Minister Lampe lo tuma cuater accion inmediato riba tereno di enseñanza

Minister Lampe lo tuma cuater accion inmediato riba tereno di enseñanza

ORANJESTAD (AAN) – Minister di Enseñanza drs. Rudy Lampe, a participa den e conferencia di Gobierno Diaranzon mainta, y a cuminza expresando palabranan di condolencia na henter nos comunidad, y na famia di e dos criaturanan inocente, victima di e caso conoci.

“Ningun dolor, ningun sufrimento, ningun sacrificio por ta en vano y pesey aworaki a yega e momento di accion pa atende e problema aki di abuso di mucha den nos comunidad.

“Door di e sacrificio, dolor y sufrimento di e tragedia humano, nos tin aworaki ta wordo obliga na pensa den e mesun direccion riba un tema cu a keda pendiente, y cu aworaki nos tin cu actua riba esey.

Nos Sociedad, nos comunidad, no por tolera mas abuso di mucha, y pesey como Minister di Enseñanza, tambe den colaboracion cu nos Prome Minister y demas ministernan, nos a dicidi cu lo mester bin cu un accion di inmediato”, e titular a subraya.

Minister Lampe a splica cu e prome accion a cuminza ayera atardi mes, cu un reunion cu e Buro Leerplicht pa asina aki bay wak na unda tin obstaculonan burocratico y pa implementacion di e ley pa evita cu den futuro, ta surgi otro situacion manera e caso tristo aki, cu ya pa fin di Augustus caba y cuminzamento di September ya caba e muchanan no a presenta na scol y tog no tabata tin e follow up necesario.

E di dos accion, e gobernante a sigui splica, ta cu nan ta bay reuni e siman aki caba cu tur esnan cu, organizativamente, ta encarga cu tur e cabezantenan di scol pa asina aki planea un encuentro cu e cabezantenan di scol unda cu nan ta bay haya entrenamento riba e conocimento di e ley Leerplicht. “Esey tambe falta cu, como cabesante, nan ta mara na ley cu despues di diez dia di ausencia di un mucha na scol mester meld esaki. Bo no ta para riba ley, bo no por actua contra ley, pero e falta di conocimento di e ley aki ta general bao di nos ciudadanonan, pero nos kier remedia esaki cu un sesion special cu nos cabezantenan di scol” Minister Lampe a indica.

E mandatario a menciona e di tres accion cu lo wordo implementa y cu ta consisti di entrena nos maestronan pa nan por detecta señalnan, ya cu nan tin contacto directo cu e alumnonan, cu por trata di posible caso di abuso cu e mucha por ta victima.

Abuso di mucha ta referi na diferente dimension, e mandatario a subraya. Por ta abuso verbal, emocional, fisico, sexual. “Nos kier train nos maestronan pa nan por detecta y bisa cu enberdad e conducta di e mucha aki por duna indicacion cu e ta victima. Y un bez cu nan observa esaki pa nan por meld na e punto central riba posible casonan di abuso di mucha”, e mandatario a declara.

Diamars caba el a papia cu un fundacion pa riba Dia Internacional di Derechonan Humano, dia 10 di December, cuminza cu e prome conferencianan pa entrena nos maestronan.

Den contexto di e di cuater punto di accion, Diaranzon mainta e mandatario a reuni cu Departamento di Enseñanza, unda cu tin un plan integral di maneho pa nos hubentud, cu aworaki mester wordo acelera.

“E mensahe ta cu cada departamento ta traha manera un isla riba nan mes y aworaki mester bin un cooperacion integral entre e diferente departamentonan pa loke ta trata maneho pa nos muchanan y nos hobennan, basa riba un vision educativo”, Minister Lampe a señala.

Esaki kiermen educa e muchanan cu ta un trabao di henter e comunidad pero mester bay traha mas na un forma integral, y e maneho aki pa mucha y hobennan na nivel educativo lo wordo desaroya en colaboracion estrecho cu departamentonan social, cu ta cay bao di Minister sr. Glenbert Croes.

E plan integral aki, door di e suceso tragico aki, ta bay den un proceso di aceleracion, pa asina aki por atende loke ta conoci dentro di un cooperacion entre scolnan, maestro, alumno y mayornan. E triangulo aki mester dune contenido, pasobra educacion y enseñanza mester ta algo, no solamente di e maestro, pero e ta cuminza na cas. Esakinan ta algun di e accionnan inmediato di parti di Ministerio di Enseñanza en cooperacion cu e demas ministerionan bao liderazgo di Prome Minister sra. Wever-Croes.