Home » Latest News » Mediador lo warda un rato y dado momento yama partidonan FTA y CMB na mesa

Mediador lo warda un rato y dado momento yama partidonan FTA y CMB na mesa

ORANJESTAD(AAN): Mediador di Gobierno , Anselmo Pontilius a splica cu awor aki ta pendiente pa haya e firmanan di trahadornan di CMB cu kier ta parti di sindicato FTA. Si e dunado di trabao bisa cu e ta reconoce e sindicato, asina mes e pruebanan ey mester bin riba mesa. Ta pendiente e contesta.

Si no tin e contesta, nan ta acepta boluntariamente, e ora e procedura legal tin cu continua y den esey tambe lo haya lista di e dunador di trabao, e trahadornan y tambe esun di e sindicato.

Particularmente kier purba di evita, specialmente no pa motibo di referendum, sino den cual e sindicato, den nomber di trahado, ta remarca cu e dunado di trabao lo a kita condicionnan di trabao. Si haya indicacion cu esey lo por causa un conflicto laboral, mediador di gobierno tin e tarea pa yama e partidonan hunto.

Lo warda te cu diaranson otro siman pa tende for di e partidonan kico nan a contesta otro, con nan ta atende cu otro. Caso contrario lo invita nan na mesa.

FTA ta sali for di punto di bista cu mayoria di e trahadonan laborando na e banco aki, a acerca nan y yena e formulario pa autorisa FTA pa papia den nan nomber, segun Mediador Pontilius.

Ley no ta permiti facilmente como dunador di trabao pa kita condicionnan di trabao secundario of primario unilateralmente. Den nos codigo civil, den nos leynan ta para bon cla cu e dunador di trabao tin cu tene masha bon cuenta si e dicidi pa un of otro motibo pa bay kita condicionnan di trabao.

Hopi biaha esey ta pasa ora cu un compania por duna prueba cu financieramente e tin dificultad of e no por sigui cumpli cun’e y esey ta un proceso basta largo.

No ta haci’e di un dia pa otro. Si ta pensa di haci algo mes como dunado di trabao, lo tin cu tene un consulta basta adelanta cu e trahadornan, pasobra si ta condicionnan di trabao cu ta existente sigur pa hopi aña, esaki a bira parti di e contracto individual di trabao di e trahado. Consecuentemente ta viola su contracto individual di trabao y cualkier caso den corte, hues por coregi esaki mesora.

Tin cu warda

Por ta CMB ta contesta FTA y bisa no y busca un referendum. Esey no ta kita afo cu por reuni cu nan, pasobra tin e asunto di condicionnan secundario di trabao cu por wordo kita.

Esaki ta prome biaha oficialmente cu a haya un carta riba esaki.