Home » Latest News » Mas di 4800 cliente a paga caba nan plachi di number

Mas di 4800 cliente a paga caba nan plachi di number

ORANJESTAD(AAN): Departamento di Impuesto a cuminsa cobra caba pa plachi di number di auto. Segun directora di e departamento, Luenne Gomez-Pieters, ta brinda oportunidad na nan clientenan pa por cuminsa haci pago di impuesto di vehiculo di motor.

Normalmente fin di November, cuminsamento di December, den e aña aki no ta diferente. Ta basta satisfecho si mira e fluho di cliente y pagonan cu a cuminsa drenta pa e impuesto di vehiculo di motor 2018, por bisa cu tin 4800 cliente cu a paga caba nan plachi di number pa 2018.

Esaki ta hopi bon, mirando cu e feedback cu ta haya cu no kier para den rij y pa fin di Januari e deadline lo bay bin. Nan ta probecha pa haci uzo di e oportunidad aki awo y bin paga e impuesto di vehiculo di motor.

Tambe a ripara cu esnan cu bin paga ta paga tambe full aña. Manera ta conoci, clientenan cu tin plachi di number A, por paga e impuesto di vehiculo di motor den dos pago, caminda cu e prome deadline ta dia 31 di Januari.

E di dos deadline ta 30 di Juni. Esey ta pa di tres y di cuater kwartaal. Pero e clientenan ta duna feedback cu ta un biaha nan ta bin para den rij y ta paga den un solo pago y esey tambe na final ta yuda e entradanan pa loke ta impuesto di vehiculo di motor.

Ta mira tambe cifranan compara cu aña pasa y pagonan cu a sosode di e aña aki y por remarca cu tin ainda un 8000 cliente cu no a paga nan impuesto di vehiculo di motor di 2017.

Esey tin atencion di Departamento di Impuesto. Durante 2017, a manda varios carta di notificacion, caminda cu e cliente no a cumpli cu e pago di impuesto manera mester ta, pa stimula e cliente pa bin y haci su pago voluntario.

Si esaki no ta e caso, na momento cu nan bin paga nan 2018, nan ta haya nan confronta cu no por procesa e pago pa 2018 si 2017 no ta paga. Esey ta algo cu semper a mantene y ta keda mantene esaki tambe durante aña.