Home » Latest News » KWF ta hopi contento cu hobennan ya caba ta pensa riba yuda den combatimento y tratamento di cancer

KWF ta hopi contento cu hobennan ya caba ta pensa riba yuda den combatimento y tratamento di cancer

ORANJESTAD(AAN): Lilian Prins, presidente di Koningin Wilhelmina Fonds  Aruba (KWF) ta sumamente contento cu e evento cu studiantenan di EPI ta bay organiza riba 9 di December, pa recauda fondo pa e fundacion cu ta traha duro pa yuda hendenan cu ta sufri di cancer.

Durante un conferencia di prensa, señora Prins a bisa cu KWF na e momentonan aki tin man yen di trabao y esey ta trece cune hopi gasto.

“Pesey nos ta contento cu hobennan for di trempan ta pensa riba un fundacion cu ta traha den e comunidad aki, contra un malesa cu yama cancer, cu na e momentonan aki practicamente ta bati na porta di tur hende”.

Esaki segun e presidente di e fundacion, kende a sigui bisa cu e enfermedad ta trece hopi gasto cune.

Banda di e parti cu Gobierno ta contribui cune, KWF tambe ta yuda pa cubri gastonan.

“Nos ta spera cu comunidad di Aruba manera semper, lo sa di apoya nan cu nan evento”, segun señora Prins.

El a bisa tambe cu e trabaonan di KWF e aña aki ta bayendo bon, apesar cu e gastonan ta halto.

Prensa a puntra Prins cua ta e tipi di cancer cu mas tin na aruba actualmente y el a bisa cu ta cancer di pecho.

“Tin diferente otro tipo di cancer, pero door cu no ta tur ta yega na KWF, nos no por bisa cuanto caso tin etc.”.

Esaki segun Prins, kende a bisa cu KWF ta traha na un manera estrecho cu AZV, pa duna tur esnan cu tin mester di ayudo ricibi esaki.