Home » Latest News » Hopi hende a acudi na Misa special na honor di e dos criaturanan

Hopi hende a acudi na Misa special na honor di e dos criaturanan











ORANJESTAD (AAN): Diahuebs atardi por a mira hopi hende acudi na e Misa di Alto Vista, pa e santo sacrificio di misa special pa e dos criaturanan cu a perde nan bida y cu a sacudi Aruba.

E atardi mes a cuminza cu un Caminata di Silencio for di Tanki di Alto Vista te na Kapel.  Durante esaki, a medita riba sufrimento di muchanan, y pa concientiza pueblo pa asina algo no pasa asina hamas.  Un bunita poster di e dos angelitonan a wordo imprimi tambe.

Segun Atan Lee a relata na DIARIO, di e forma aki riba nos mes por yuda contribui pa e cosnan aki stop, para tur abuso di mucha, y pa no laga muchanan sufri mas.

Tur hende a cana bay den silencio, algun cu bela den man.  Despues a sigui un Misa na Alto Vista, cu a wordo transmiti pa Diario TV tambe.  Por a mira presencia di Ministro di Husticia, Andin Bikker como tambe Ministro di Enseñanza Rudy Lampe.

Atan Lee a keda contento cu hopi hoben a participa den e Caminata y na e Misa.  Ta nan ta e futruro di pais y e tragedia aki no por ripiti mas.