Home » Latest News » HopeAruba Movement ta introduci di dos campeon di exito di area: FAMIA

HopeAruba Movement ta introduci di dos campeon di exito di area: FAMIA

ORANJESTAD (AAN)–  Den e luna di October HopeAruba ta introduci su coordinadornan di e areanan di exito atraves di e produccion titula: “A Look at Myself” Series, unda nan lo introduci tur e personahenan, comparti nan biografia y motibo cu nan a sinti nan yama pa uni nan mes na e plataforma di HopeAruba.

 

Area di prosperidad

Fundador, Sra. Malmberg recientemente a comparti cu HopeAruba a defini 5 area unda prosperidad pleno ta caracterisa. Ta trata aki di e area Relacional, Fisico, Emocional/Mental, Spiritual y Financiero. Cu nan ta midi den 5 area di Exito.

Areanan di Exito
Aki ta trata di e persona como: Individuo, como miembro di Famia, Comunidad y Nacion, como tambe, nos Balornan. Esakinan HopeAruba ta referi na nan, como Areanan di Exito.
Cada Areanan di Exito ta un plataforma pa colaboracion caminda personanan y organisacionan ta invita pa uni forza, talento, conocemento y bini hunto pa pensa riba solucionan pa retonan cu nos pais ta enfrenta den cada area.

Siman pasa HopeAruba a introduci e coordinadora di e prome Area di Exito, cu ta esun di e area di Individuo. Ta trata aki di Sharleen Tromp, kende ta un Entrenador di Personalidad Certifica cu den HopeAruba ta coordina e Area di “Individuonan ta Bon y Bon Ekipa pa yega nan Potencial Maximo”.

Introduccion coordinadora: Famia

E siman aki, HopeAruba ta introduci e coordinadora di e di dos Area di Exito, cu ta esun di e area di Famia – Famianan ta sano y completo. Ta trata aki di Sra. Quilin Arends, kende ta un Entrenador di Famia y actualmente ta Directora di Stichting Casa Cuna Progreso.

Den A Look at Myself” Series, Arends ta comparti tocante e jornada di su propio bida unda el a experiencia abuso, divorcio di su mayornan y pobresa, sinembargo a vence esakinan cu sosten di esnan rond di dje y awe, e mes ta un sosten, na esnan cu ta experienciando e mesun retonan cu ela experiencia na mucha.