Home » Latest News » Gerald Luidens a fayece den accidente cu coriente

Gerald Luidens a fayece den accidente cu coriente

ORANJESTAD    (AAN): E conocido Gerald Luidens, ta doño di e compania Fast Signs NV, cu desde 1991 ta ofrece servicio di traha borchi, cualkier poster, y ta encarga pa promove companianan usando “billboards” grandi rond di e isla.

E compania tin su trahadornan cu ta haci e trabao pe, pero como cu Gerald ta un persona dinamico y perfeccionista, e gusta haci tin biaha e trabao su mes.

Pesey mes, Diasabra alrededor di 6:00 pm, Gerald di 51 aña di edad a yega cu su Ford Explorer color cora riba caminda grandi di San Nicolas pa Playa, na altura di Camacuri.  Esaki net un tiki pabao di e oficina di Budget Car Rental.

Tras di su Ford Explorer e tin un aanhang wagen, cu ta realmente un machine cu awor ta ser yama “Man Lift”.  El a pone un hemchi di verf color blanco riba dje, y asina el a subi pa asina keda cla pa kita e poster bieu for di e billboard, y whitewash esaki.

Ta djis un pida repi so tabata falta pa el a keda cla pa e atardi.  Cu hopi cautela Gerald a maniobra e Man Lift pa asina e no dal den e wayanan di voltahe regular cu tin mas abao.

Pero algo a bay malo, y kico ta e causa posiblemente lo keda desconoci.  Kizas biento duro a pone e Man Lift hala un tiki?  Of kizas inconcientemente el a maniobra y pone e Man Lift bay mas halto, y dal cu su cabez den e waya di Alto Voltahe di 12.000 volt cu ta mas na halto.

E impacto aki a causa un flash masha cla mes, acompaña cu un sonido duro.  Su cabez a keda pega na e waya di coriente, y esaki a cuminza kima.  E momento ey, e cabez tabata pega na e waya di coriente, y un di su mannan tabata riba e control-handle di e Man Lift.

Testigonan cu a mira kico ta pasando, a core yega cerca y cuminza notifica autoridadnan.  Pero nan ta para abao, y por haci nada.  Keto bay nan a mira con candela ta sali di su curpa.

Diripiente e waya diki di 60.000 volt a kima te smelt, y kibra den dos.  Un di e wayanan a cay riba e Ford Explorer eybao, y keto bay tabata live cu coriente.  El a cuminza spat candela, y un testigo a revela cu hasta e wiel parti dilanti di e SUV a cuminza kima.

Ora cu e waya a kibra den dos, e curpa di e victima a sak den otro y keda pega den un skina di e Man Lift, cu keto bay ta na halto.

Vehiculo di Rescate di Cuerpo di Bombero, Ambulans, y Polisnan a yega pero no por a haci nada.  A dicidi na cera e pida caminda pa trafico.  Aunke e lugar a yena di hende, cu ta cana tur atardi y anochi riba Linear Park.

Personal di NV Elmar tambe a yega, y a desconecta coriente.  Funcionarionan di Departamento di DTI a bin duna man y conseho con pa anda cu e situacion, y tambe a cuminza investiga e accident.

Cu dos Bucket Lift di NV Elmar, Paramediconan y tambe Bombero a logra bay halto pa asina mira e condicion di e victima.  Aki a nota cu e no ta duna señal mas di bida.

Pa baha e victima, pa basta rato un cantidad di tecnico a traha riba e motor y sistema di e Man Lift.  Na final, a dicidi na laga e victima den e Man Lift mes, y busca forma con ta pone e aparato funciona bek.  Esaki a dura casi 2 ora, debi cu ta haci tur cos cu seguridad en mente.

Ora cu finalmente a logra pa e Man Lift funciona y baha, a laga Docter check e victima.

Pa 8:15 pm, Dr. Dirks a constata morto di Gerald Frederick Luidens, naci na Aruba dia 12 di April 1965 y biba na Caya Rubi.

Apenas Diahuebs cu a pasa, Gerald tabata e tata di mas feliz na Colegio Arubano, pa graduacion di su yiunan.  DIARIO a hasta saca su potret riba e atardi alegre y feliz di dje.

Gerald ta wordo considera como un persona hopi social, alegre, y un tata y esposo sumamente dedica.  Den su trabao tambe, su compania a demostra profesionalismo den su trabao, y e stima loke e tabata haci.  Pesey e accidente aki ta algo cu su trahadornan, y amigonan no por compronde con el a socede.

Na su mama, ruman, esposa, yiunan, trahadornan y amigonan, DIARIO ta manda palabranan di condolencia.