Home » Latest News » Famianan di Wouter de Ruiter ta pone hospital responsabel pa morto di Wouter de Ruiter

Famianan di Wouter de Ruiter ta pone hospital responsabel pa morto di Wouter de Ruiter

ORANJESTAD(AAN): — Famianan di Wouter de Ruiter a bin padilanti y den un carta manda pa bestuur di hospital, ta pone nan responsabel di morto di nan ser keri. Den un carta fecha dia 21 di November, 2017, famianan ta indica tambe cu neurociruhano dr. G. Lacle, a trata e asunto.

Wouter de Ruiter a meld pa prome biaha dia 23 di October 2017, cu dolornan di cabes pisa na SEH. Eynan nan a bis’e cu ta gewoon dolor di cabes e tabata tin y cu ta paracetamol e tin cu bebe. E dolor di cabes sinembargo no kier a kita y Wouter a sigui saca.

Riba dia 31 di October, un biaha mas el a bay SEH. E dolor di cabes tabata insoportabel y e ta sigui aumenta. Despues di a warda largo, nan a bin tuma muestra di sanger. A dune remedi. Aunke cu a splica cu door di e sacamento e remedinan tabata en bano, el a wordo manda cas un biaha mas.

Riba dia 2 di November, 2017, el a bay bek SEH cu dolor di cabes enorme y sacamento di sanger. Eynan, despues di tanto warda, a tuma muestra di sanger. Apesar di un peticion pa un CT-scan of pa un specialista wak Wouter, esaki no a pasa.

Riba dia 5 di November, 2017, a bolbe bay SEH. Despues di a warda 4 ora y Wouter na grito cu dolor den e area di espera, el a wordo tuma den hospital y riba piso 3 a haya un inyeccion contra dolor. Wouter a drumi y a urina den su soño, pero apesar di e peticion door di su mama, e no a ni wordo haci limpi y a keda pa oranan largo den su urina. E tabata tin mester di a sosega, segun e zuster. Despues Specialista Lacle, a bisa cu como neurologo, mester lanta e pashent cada dos ora. Mainta a tuma sanger, pero Wouter no a reacciona mas riba e priknan.

Rond di 10’or, un specialista habla Ingles a bin. Esaki a constata di biaha cu Wouter tabata den un coma. Wouter a wordo hiba di biaha pa e unidad di cuido intensivo. Di biaha el a wordo baña. Famianan di biaha no tabata tin mag di ta hunto cu Wouter. Despues Wouter a wordo hiba pa pasa door di CT-scan. Despues di varios ora, e famianan a wordo informa cu Wouter tabata clinicamente morto.

Despues di esey, nan a papia cu specialista Lacle, kende a conta cu Wouter tabata tin un tumor na su cabes y cu no por a haci nada mas p’e. Dr. Lacle a conta cu e no ta compronde dicon e no a wordo yama mas tempran. Wouter no tabata tin mester a fayece di e tumor, segun dr. Lacle. Sigur si el a wordo yama na ora y a pone un drain, e ora Wouter no lo a muri.

Por medio di e carta, representante di e famia di Wouter de Ruiter, mr. Edwin Duineveld, ta pidi pa directiva di hospital, ta reconoce pa dia 24 di November, 2017, cu nan ta responsabel pa morto di Wouter de Ruiter. Si esaki no sosode, e clientenan lo tuma medidanan legal.

E carta aki, no solamente a bay na directiva di hospital, sino tambe pa e instancianan necesario pa esaki.

CONTESTA H.O.H.

Hospital no a tarda den contesta e carta cu representante di e famianan di e difunto Wouter de Ruiter, Edwin Duineveld, caminda cu ta pidi pa e hospital para responsabel pa morto di e pashent. Miembro di directiva di hospital, sr. M. de Kool, a splica den nan carta cu riba aceptacion di e responsabilidad cu kier pa hospital tuma, nan no por para pe, mirando cu na e momentonan aki, mirando cu tin un investigacion interno andando a base di e morto di e pashent, ainda no a keda conclui. Loke tambe a comunica na e representante ta cu hospital riba su mes no por otorga ningun detaye medico di e pashent, entre otro e resultadonan di dicho investigacion, sin un apoderacion di e representantenan legal di e pashent. Riba e apoderacion aki, tin cu tuma contacto cu e mediador di keho (Klachtenbemiddelaar) di hospital, sra. Thairine Becker, e carta a conclui.