Home » Latest News » Ex prome minister Mike Eman NO a fayece

Ex prome minister Mike Eman NO a fayece

ORANJESTAD(AAN): — Diasabra tabata tin hopi comentario, reaccion, noticianan cu tabata circula relaciona cu fayecimento cu ex prome minister Mike Eman. Hasta a menciona cu el a fayece na edad di 56 aña. E noticia aki a wordo skirbi full na Ingles y el a trece ola di reaccion di preocupacion den comunidad.

Hopi, mirando e forma cu e noticia aki a wordo traha, ta como sifuera un noticia tabata real, full compila y hinca den otro y hasta a bay viral. A bay hasta internacional. A resulta cu e noticia aki tabata 100 porciento falso.

Ex prome minister Eman no ta ni malo di salud,  tampoco a fayece diripiente. Esaki ta un noticia cu sigur ta di lamenta, cu noticianan asina aki ta wordo plama rond y hasta tin hende sin cu sa, ta sigui share e tipo di noticianan falso aki.

Prome minister Mike Eman, durante diasabra tabata basta druk na Cas di Partido AVP. E tabata atende diferente encuentro y preparacionnan cu e partido lo tin. Tambe e tabata riba caya, bishitando diferente cas y repartiendo basket pa esnan den necesidad, manera ta tradicion di tur aña den e temporada di Pasco.

Na ningun momento tabata tin ningun informacion oficial of di berdad cu ta bisa cu ex prome minister a fayece. E ta bon bon di salud y hasta e tabata hunto cu diferente persona den comunidad, haciendo trabaonan voluntario y gestonan di caridad.

Ta di spera cu e noticianan aki no ta sigui wordo reparti rond pasobra e ta trece hopi preocupacion, mirando e admiracion cu ex prome minister Mike Eman tin den comunidad.