Latest News
Home » Latest News » Esnan cu a pone placa pa Green Corridor ta duna Gobierno te cu 14 di Februari pa yega na un solucion

Esnan cu a pone placa pa Green Corridor ta duna Gobierno te cu 14 di Februari pa yega na un solucion

ORANJESTAD  (AAN): Diahuebs mainta durante un conferencia di prensa, Minister di Infrastructura Otmar Oduber a duna un update di e asunto di Green Corridor, unda cu door cu lo tin fayonan den e proyecto, e asina yama ‘Lenders’(esnan cu a yuda cu prestamo pa e proyecto) lo por exigi e pago cu nan tin cu ricibi atravez di añanan, den un solo tiro.

Henter e caso aki ta uno cu lo por termina na corte, pero e mandatario a indica cu ta purbando di yega na e mihor solucion pa tur partido y esey no ta inclui bay corte.

Oduber a trece dilanti cu e Lenders ta na Aruba y lo reuni cu AIB Bank, Gobierno y e companianan encarga cu e proyecto di entre otro e brug.

E Lenders a duna 1 luna di tempo, esta te cu 14 di Februari, pa haya un indicacion di Gobierno di Aruba y Odinsa, si nan por yega na un entendimento.

Si no yega na un acuerdo, inmediatamente e Lenders lo por ranca e plug, unda cu nan no ta pone solamente Odinsa responsabel, sino Aruba tambe.

“Den e caso aki nos ta yuda Odinsa pa yuda nos mes, pasobra sino esaki por perhudica Aruba”, segun e mandatario, kende a bisa tambe cu un parti bastante fastioso pa nos isla e ora ey lo ta cu e trabao di mantencion di e proyecto cu ta inclui e brug, cu mester wordo hasi pa Odinsa como servicio durante e añanan nos dilanti, lo tin cu bay wordo hasi pa Aruba mes.

Oduber a indica cu a busca profesionalnan adicional pa yuda cu e proceso di negociacion cu a indica caba Diahuebs, pa asina evita cu Aruba ta sufri un perdida grandi.