Home » Latest News » Despues di 10 aña Kustwacht lo bay haya 12 boto nobo

Despues di 10 aña Kustwacht lo bay haya 12 boto nobo


ORANJESTAD   (AAN): Kustwacht ta hayando algun embarcacion nobo. Nos conoce Inshorenan den pasado. Super Rhib. Vocero di Kustwacht pa e region Caribense, Roderick Gouverneur a splica cu na 2004 Kustwacht a haya e famoso SupeRhibnan cu ta den uzo te cu awor aki. Lamentablemente despues di tanto aña di bon servicio, ta saca for di servicio y bin cu boto nobo.

Tempo cu a cuminsa na 1996, tabata tin algun boto di patruya na tur e puntonan di sosten. Nan tabata tin e Inshorenan cu ta mas chikito, cu tabata nabega cerca di costa. Despues a haya e Super Rhibnan y awo despues di mas di 10 aña di servicio, Kustwacht ta haya boto cu ta mas friendly pa e usuario, cu por nabega mas miho y esakinan ta e Metalsharknan. Metalshark ta un boto cu a proba su mes den e region di Caribe.

Ta un boto cu ta wordo traha na Merca y hopi Coast Guard di Merca y tambe islanan den region ta uza e metalshark aki. E tin casi mesun capacidadnan cu e Super Rhib. Pero locual ta bon di dje ta cu su cabina ta cera y ora ta nabega riba dje, bo no ta muha. Den oranan di anochi bo no ta sinti friu y e stoelnan ta mas comodo tambe, cu no ta dunabo hopi problema cu lomba y rudia door di e golpi cu e lama ta haci.

E ta un boto hopi bon. Kustwacht ta hopi contento cun’e. Pronto esakinan lo cuminsa yega. Na Februari e promenan lo yega y durante e proximo aña lo continua na bin cu nan, te ora cu ta full capacita. E idea ta cu ta bin cu 12 di e botonan aki y nan lo wordo reparti entre e puntonan di sosten di Aruba, Corsou y St. Maarten.

Segun Gouverneur, e awanan ta diferente. Dia cu a bin cu e Super Rhibnan, a test den awanan Europeo, esta Noordzee, cu e lama no ta bruto manera e lama na Aruba y e lama ta hopi mas salo. E lama ta diferente. Locual a haci e biaha aki, a bay cu personal di cada un di e steunpunten, tur a bay Merca y a haci test riba e botonan aki y tur a bin cu diferente recomendacion kico ta ideal pa den e awanan aki, kico nan ta sinti falta di dje. Kico nan ta kere cu e botonan aki mester. A base di e informacion y input cu a haya di tur cu a uz’e, a produci e boto aki cu ta bay bin, cual ta e Metalshark.

Ora e botonan yega, e compania Mericano ta bin pa duna training riba e botonan aki y tur cu ta nabega riba nan, mester pasa un training pa por sigui uzanan.

Cada pais mester contribui di nan banda financieramente. Nan tin un parti cu cada pais mester duna. Segun Roderick Gouverneur, cada pais mester paga un porcentahe pa kustwacht opera.

E tarea di kustwacht ta double. Un di e tareanan mas grandi ta combatimento di droga y tur locual ta ilegal riba nos lamanan. Tambe tin e parti di Search & Rescue cu ta yudamento di hende of boto cu tin problema riba lama.