Home » Latest News » Desicionnan cu Gabinete Mike Eman a tuma den periodo demisionario no ta valido

Desicionnan cu Gabinete Mike Eman a tuma den periodo demisionario no ta valido

GOBIERNO DI ARUBA:

Prome Minister Evelyn Wever-Croes:

Mike Eman a pusha hopi hende den aparato gubernamental despues di eleccion

Esnan cu no tabata ambtenaar prome y tabata traha den bureau di minsternan a haya carta

ORANJESTAD(AAN)– Aparte di tur e problemanan cu e Gobierno aki a haya cu e traspaso di gobernacion cu ya na varios ocacion Gobierno di Aruba a menciona, a haya hopi sorpresa riba e tereno di personal. Gobierno anterior, den su ultimo dianan, papiando aki specificamente riba 20 di october 2017 despues di eleccion, a pone diferente hende den servicio di gobierno como ambtenaar. Tocante esaki Prome Minister di nos pais, Sra. Evelyn Wever-Croes a bisa cu e decisionnan aki no ta valido pa ley.

E mandatario ta bisa cu tur hende sa, cu na momento cu un gobierno bira demisionario, e no por tuma e decisionnan aki mas. Esaki no ta regla di Prome Minister Evelyn Wever-Croes, tampoco ta regla di Sr. Mike Eman, sino un regla general. Un gobierno demisionario por tuma solamente decisionnan coriente.

Dia 21 di september, gobierno di Mike Eman a entrega su retiro y a bira un gobierno demisionario. Y desde e momento ey, Mike Eman y tur su ministernan tabata sa cu tur decision cu nan tuma ta invalido. Sinembargo nan a tuma e decision pa hinca hopi hende den e aparto gubernamental ilegalmente y awo ta culpa e gobierno actual pasobra e gobierno aki no por ehecuta e decisionnan aki.

Refiriendo na e cartanan cu a bay na varios persona cu a wordo hinca den gobierno como ambtenaar den e periodo demisionario, Prome Minister ta laga sa cu esakinan a wordo manda solamente pa esnan cu no tabata ambtenaar prome y tabata traha den oficinanan di Minister. Riba e payslip di e hendenan aki ta para “Bureau Minister”. Esakinan ta esnan cu e gobierno demisionario di AVP a pusha den nos aparato gubernamental den e periodo demisionario.

Esakinan ta esnan cu aparentemente no tabata di e importante ey pa e gobierno saliente y como tal no a logra acomoda nan prome cu el a bira demisionario manera cu si el a haci ya desde comienso di aña 2017 cu e resto di e 500 coordinadornan cu tabata trahando p’e.

Prome Minister Evelyn Wever-Croes ta indica cu e decisionnan aki ta invalido y ta e personanan aki, un total di mas o menos 100 persona, a haya un carta cabamento di aña pa informa nan cu e decision no por wordo ehecuta pa motibo cu esaki a wordo tuma den un periodo cu esaki no por wordo respeta.