Home » Latest News » Conseho di Minister a decreta un Dia Nacional di Luto

Conseho di Minister a decreta un Dia Nacional di Luto

Riba mesun dia cu lo dera e dos rumannan:

ORANJESTAD (AAN) – Prome Minister sra. mr. Evelyn Wever-Croes, den conferencia di prensa Diaranzon mainta, a duna di conoce cu den Conseho di Minister Diamars, nan a yega na varios conclusion y decision. Esaki relaciona cu maltrato di mucha, specificamente motiva pa e caso tristo di asesinato cruel di dos criatura, door di nan Padrastro.

E dignatario, na prome lugar, a duna di conoce cu Conseho di Minister a dicidi pa decreta un Dia Nacional di Luto e mesun dia di entiero di e muchanan.

“Dia Nacional di Luto, pakico? Pasobra ta momento pa nos como comunidad para keto y reflexiona. Y door di declara un Dia Nacional di Luto, nos speranza ta cu cada ciudadano di e pais aki ta para keto reflexiona ta kico ta sosodiendo y specialmente con nos kier guia e pais aki, unda nos kier hiba nos pais y kico nos mester haci pa evita cu algo asina bolbe pasa.

bandera half stok:

“Un Dia Nacional di Luto den cual nos ta haci un apelacion na tur Departamento di Gobierno pa pone bandera half stok”, e mandatario a indica.

Historia pa nunca lubida:

“Tambe mi ta apela pa trata e tema aki di Abuso di mucha na scolnan. Pa tur nos hobennan cu ta bayendo scol no lubida e historia aki nunca. Y pa tur esnan cu ta pasando den situacionnan similar sinti cu eyfo tin hende cu tin oido pa nan, cu tin hende cla pa yuda nan, pero specialmente pa muchanan sinti y realiza cu biba den abuso no ta normal. Cu ora bo wordo abusa bo tambe por bisa y haci algo”, e dignatario a expresa.

Caminata na final:

Minister Presidente a invita henter pueblo pa un caminata na final di e Dia Nacional di Luto.

“Un Dia Nacional di Luto cu nos kier finaliza cu un caminata, unda cu pueblo por bin hunto y nos por scucha testimonio, reflexionnan y haya e forza y compromiso di bin dilanti y percura pa algo asina no ripiti” e dignatario a duna di conoce. E detayenan riba e evento aki e dignatario a menciona cu ainda nan ta trahando riba nan y na momento cu tin mas detaye lo divulga esakinan na prensa.

E dignatario a splica cu Gobierno a cuminza cu e tema aki, pasobra nan kier demostra como Gabinete y como comunidad nos tur ta para pa stop cu abuso di mucha.

“Nos ta para riba un linea pa loke ta trata convivencia cu e famia y cu henter comunidad, pero cu nos kier tambe pa algo wordo haci” sra. Wever-Croes, a subraya.