Latest News
Home » Latest News » Celebra Dia di Betico na Museo Historico Aruba

Celebra Dia di Betico na Museo Historico Aruba

ORANJESTAD(AAN)– Dia di Betico ta den porta y e team completo di Museo Historico Aruba (MHA) ta den ful preparacion pa ricibi pueblo di Aruba ariba e dia aki. E museo, cu ta situa dentro di e murayanan di Fort Zoutman y Willem III Toren, lo habri su portanan pa publico for di 10’or di mainta te cu 4’or di atardi. Entrada durante e actividad aki lo ta solamente 1 florin pa persona.

Ariba e diahuebs festivo aki lo tin diferente stand pa deleita e paladar di grandi y chikito. Lo bai tin, entre otro, e cuminda dushi di Pure Local by Chef Andrew, diferente tipo di sopi, incluyendo sopi di oester y crema di pampuna y no lo por falta un variacion di cos dushi manera cocada, cuki lerchi, bolo y mucho mas. Tambe nos lo tin un bar bon surti, diferente mesa di artesanonan y un dushi ambiente cu musica tipico den background.

Durante e festividad tambe lo tin un actividad na cual tur hende por participa. Ta trata di e segundo Selfie Scavengerhunt cu lo ta en conhunto cu e museonan na San Nicolas, esta Museum of Industry y Community Museum. Na cada museo lo tin un opdracht pa saca selfies y pa post esakinan ariba Facebook pa asina por participa pa gana diferente premio. E premio mayor lo ta un weekend stay na The Ritz-Carlton Aruba.

Ta invita tur hende pa pasa bishita Museo Historico pa pasa un rato agradabel, saborea diferente cuminda y no perde e chens pa gana e weekend stay.