Home » Latest News » Caso cu a shock pueblo a pone Gobierno core tene reunion extraordinario

Caso cu a shock pueblo a pone Gobierno core tene reunion extraordinario

LAST UPDATED: 1:40 pm

ORANJESTAD (AAN): E caso grandi e siman aki, unda un mucha Rishandro di 5 aña di edad a perde su bida debi na maltrato severo, y e hecho cu su ruman chikito Eugene di 3 aña ainda ta perdi pa como 2 luna, a crea reaccion den pueblo, y ainda Diasabra hendenan ta den shock.

E reaccion di pueblo a pone cu Gobierno a core tene un reunion urgente.  Como cu Prome Ministro Evelyn Wever-Croes ta den exterior, e ora a  toca turno pa Vice-Premier Otmar Oduber yama e reunion.

Esaki a bira e prome reunion di Conseho di Ministro cu Otmar Oduber fungiendo como Prome Minister di Aruba.  E reunion a atende e topico di ‘risico gezinnen’.

E reunion a wordo yama despues di e caso di abuso di mayornan na un mucha di 5 anja cu consecuencia fatal.  DIARIO a nota cu tabata presente tambe Ministro Glenbert F. Croes, Ministro Chris Romero, Ministro Lampe, y Ministro Andin Bikker.  A nota tambe presencia di esnan di Ministerio Publico, di Cuerpo Policial.

Gobierno asina na final conhuntamente cu Cuerpo Policial y Ministerio Publico a ANUNCIA BUSKEDA NACIONAL PA E HOBEN Roshandrick Frans (3 aña) cu ta perdi.

Tabata Diaranson 9:45 melding a drenta na polis cu un mucha a wordo treci door di su mama cu a bisa cu el a cay. Sinembargo docter a constata cu heridanan cu e mucha tabatin no ta cuadra cu locual cu e mama ta indica y cu ta mustra cu ta algo ‘strafrechterlijk’ lo a tuma luga den e caso aki.

Pa e motibo aki e dokter a yama polis kende a tuma contacto cu Jeugd en Zeden Politie (JZP) caminda cu un investigaciona a cuminsa tuma luga inmediatamente. Esaki a conduci na detencion di e mama y padrastro diabierna anochi despues cu e mucha a fayece.

Actualmente relaciona cu e mesun caso aki tin un mucha perdi Roshandrick “eugene” Frans di 3 aña. Aworaki ta bay over cu permiso di Conseho di Ministro, pa start un “Buskeda Nacional” y pidi asistencia di Marina Real den e buskeda.  Ta bay pidi expertonan di Hulanda pa bin duna un man, y por spera nan aki den proximo dianan.

Por yama Tipline di polis 111-41 den caso cu tin cualkier informacion den e caso aki y bo ta garantisa di keda anonimo.

DIARIO tin di raporta cu ya caba, algun ciudadano di bon curazon a cuminza ta colecta placa pa yuda Rishandro haya un entiero cu e merece.  Na e.o. Bestial Pet House na Shaba mes tin un box poni, y ya caba cantidad di  hende a pasa pone placa aden.  E ta keda net pazuid di NAPA Auto Parts.