Home » Latest News » Aruba a despedi di Shandro y Eugene

Aruba a despedi di Shandro y Eugene





















ORANJESTAD (AAN)- Ayera manera a wordo declara pa Promer Minister di Aruba Sra. Evelyn Wever-Croes, Aruba a tene su dia nacional di luto na honor di e dos angelitonan Rishandroh y Roshandrick.

Tabata sigur un dia di luto y di reflexion pa henter e pueblo di Aruba cu ta bibando den un tristeza inmenso despues di e noticia conmovedor cu Aruba a confronta cu ne caminda dos mucha a perde nan bida cruelmente.

Na varios caminda por a mira banderanan halfstok, na scolnan a tene ceremonianan chiquito pa convivi y reza pa paz y descanso di alma di e dos angelitonan cu a fayece cruelmente siman pasa.

E ceremonia di entiero mes a tuma lugar den Misa Santa Theresita na San Nicolas caminda hopi hende a bay duna nan condolencia na famianan y despedi di e dos angelitonan. Por a mira presencia di Gobernador di Aruba, representantenan di Ministerio Publico, Comisario di Polis, Parlamentarionan, Ministernan y varios persona prominente den comunidad cu a haci acto di presencia pa asina demostra nan solidaridad cu e famia.

Cancionnan di forza y consuelo a wordo canta pa Eltienne Yarzagaray, mientras e muchanan di Scol di Commandeur Pieter Boer Kleuterschool tambe tabata presente pa canta nan himno di nan scol na nan amigo pa ultimo biaha.

E cantante Alaska tambe a dedica un cancion na Shandro y Eugene y na final di atardi prome cu e cahanan di Shandro y Eugene a wordo hiba pa nan ultimo lugar di sosiego,  Jeon a dedica su cancion R.I.P. Little Soldiers na e dos angelitonan aki.

Cu Dios duna forza y consuelo na e famianan cu a keda cu un dolor inmenso atras y cu angelitonan Shandro y Eugene sosega na paz. Drumi dushi.