Home » Latest News » AAA ta den proceso pa scoge operador nobo pa e Terminal di FBO/General Aviation

AAA ta den proceso pa scoge operador nobo pa e Terminal di FBO/General Aviation

ORANJESTAD (AAN) – Aruba Airport Authority N.V. (AAA) a tuma nota di un articulo publica den medionan di comunicacion local riba 6 di December 2017 tocante e proceso di haci oferta pa por opera e terminal di FBO/General Aviation (GA) na Aeropuerto Internacional Reina Beatrix.

E acuerdo di concesion cu actualmente AAA tin cu Universal Aviation Aruba N.V. lo termina 31 di December 2017. Como resultado AAA publicamente, tanto localmente y internacionalmente a emiti e proceso di “Request For Proposal” (RFP) na September di 2017.

Proposicionnan a wordo ricibi siman pasa for di e varios companianan interesa den opera e terminal di FBO/GA. Actualmente AAA ta evaluando tur e proposicionnan ricibi y e decision final ta planea pa wordo tuma dentro di algun siman.

Pues no tin ningun negociacion tumando lugar cu un operador nobo, pasobra ainda no a scoge un operador manera e proceso di RFP ta stipula.