Home » Latest News » A logra 4345 Venezolano firmante pro Si Si Si

A logra 4345 Venezolano firmante pro Si Si Si

ORANJESTAD (AAN): E tabata un dia hopi druk pa e organizadornan cu a prepara e dia pa bay deposita e firma pa asina contesta e preguntanan relaciona cu constitucion.
4345 persona a bisa pro na e Si Si Si. Ta tres pregunta tabata tin. Actualmente na Venezuela tin cierto situacion cu ta captando atencion internacional.

Despues di 18 aña di e maneho di e gobierno, e bida di e Venezolano a bay atras grandemente. Venezolanonan ta bandonando nan pais unda nan a nace pa por sobrevivi. Hasta a haci cierto cambionan na e constitucion pa asina e gobierno di Venezuela por dura mas.
Eleccion y Democracia ta loke e pueblo kier. E pueblo cu nacionalidad Venezolano biba na Venezuela y pafo di Venezuela. Ta hopi morto a cay caba.
Mientrastanto diadomingo na Aruba e cantidad cu e organizadornan a spera cu lo bin firma tabata di 1500 persona. Mientrastanto nan a haya un sorpresa di nan bida ora cu e filanan a crece bira hopi largo. Hendenan a para den rij cu e solo cayente pa asina por firma. E organizadornan a encarga hopi bon cu nan evento di firma di e Si Si Si.
Na Aruba e cantidad cu a spera a triplifica. A logra un total di 4345 firmamento pro e Si Si Si.

Tabata tin un total di 4345 voto. Pa loke ta e pregunta 1, 4333 a vota Si mientras cu 9 a vota No y 3 voto tabata nulo.

Riba e pregunta 2. 4328 a vota Si, 12 a vota No y 5 tabata voto nulo. Na e pregunta 3, 4330 a vota Si, 9 a vota No y 6 voto tabata nulo.

Practicamente tur kier cambio den e gobernacion na Venezuela. E evento tabata tambe manera un fiesta pafo na Cas di Cultura. E Venezolanonan a uni y a considera esaki un prome celebracion. Mesun diadomingo of dialuna e firmanan y tur loke a wordo acumula lo wordo manda pa Venezuela. Eynan ya caba ta sperando riba tur loke drenta for di tur pais na mundo caminda por a vota pa e Si Si Si.

Esnan di Cas di Cultura a coopera bon cu e organizadornan. Mester a caba 4or di atardi pero mirando cu 4:30 ainda e filanan tabata asina largo, a escohe pa laga e hendenan sigui firma.
Mester a tuma lugar otro show den Cas di Cultura. Pa no stroba a cambia e forma di atende. A cambia e fila y haci otro entrada di pariba y asina garantiza cu tur esnan cu a bin por a firma pa e Si Si Si.
Organizadornan ta hopi satisfecho con tur cos a cana. Mundo completo ta siguiendo e desaroyo na Venezuela. Den tur pais den reino tabata tin e firmament y na Aruba e cantidad di 4345 tabata un record.